No.4938/2020-2021

Vawiin chawhma khan Diakkawn YMA Hall-ah Kolasib district-a Village Council Election neih zawh tak a Village Council hruaitu thar te hnenah Covid-19 venna kawng a Village Level Task Force anga mawhphurna hlanna hun neih a ni a. Pu K Lalrinliana, Minister of State, Food, Civil Supplies & Consumer Affairs Department, bialtu MLA ni bawk chu khuallian niin he hun hi a hmanpui a ni.

Minister Pu K Lalrinliana chuan khawtlang inkaihhruaina tur atan a hruaitu thlan tharte lawmpuina thu sawiin, Covid-19 hrileng mek dona kawng a hna pawimawh tak anlo chelh tawh, an chelh chhunzawm lehna tur ah duhsakna a hlan a. Sawrkar leh Village Level Task Force hnuaia NGO hrang hrangte thawh hona tha tak avangin hri dona kawngah Mizoram chu ram pum ang pawhin a titha ber pawl a nih mek thu a sawi. Minister chuan, Covid-19 dona kawngah state titha ber pawl ni mah ila, mithiamte chhut danin December 2020 hian Mizoramah hri kai mi 5000 tling tur a ngaih a nih thu a tarlang a, hemi anih avang hian ngaihtuahna fim tak puchungin, fimkhur tak a hmalak a tul thu a sawi.

Minister chuan hrileng avangin ram pumah eizawnna kawngah leh ei leh bar dapna kawngah harsatna a thlen mek thu a sawi a, theih ang tawkin Sawrkarin hma a lak thin thu sawiin Sawrkai laipui atangin thla riat (8) free ration kalpui mek a ni a, Mizoramah pawh National Food Security Act hnuai a beneficiaries-te tan a thlawn a ration sem mek chu December thleng hian kalpui chhunzawm a nih tur thu a sawi bawk a ni.

Pu K Lalrinliana chuan VC hruaitu thlan thar te chu Covid-19 hri dona kawngah leh khawthlang an kaihhruaina turah hmasawn tum a thawk tlat turin a chah a, Mizoram Finance Commission Grant chu naktuk hian sum awm ang angte pekchhuah tum a nih thu sawiin khawtlang hmasawnna tur a nih chuan VC term hmasaa ruahmanna siam tawh pawh nise ngaihtuahna zau tak hmang turin a chah. Khawtlang a hmasawnna hna kalpui te chu a tha thei ang ber ni tur a vil peih turin leh thlithlai a, ngaihtuahna seng peih turin a fuih bawk a ni.

Dr H Lalthlangliana, Deputy Commissioner chuan Kolasib district chhung a Covid-19 hri dona kawng a VLTF te mawhphurna hrang hrang hrilhhriatna hun a hmang a. Kolasib district chu bial 12 a then a nih thu leh heng bial te hi Zonal Executive Magistrate ten an vil vek thu te, mipuiten ei leh bar a harsatna an neih loh nan Essential Commodities Monitoring Team siam a nih thu te, ramria duty thlithlaitu Border Safety Monitoring team, state pawn mi tangkhang buaipuitu Stranded Migrant/Labour Monitoring Team, Covid-19 dona kawng a district chhung a hmalakna hrang hrang chhinchhiah a enlet theih a buatsaihtu Task Group on Documentation Team leh Quarantine Management Team te din a nih thu a tarlang a. Hengte bakah hian Mobile team, Sanitation leh Sanitization team-te thleng a din a nih thu a sawi bawk a ni.

Pu Vanlalfaka Ralte, SP Kolasib atangin dan leh thupek kenkawh chungchanga hriattur pawimawh ngaihthlak niin Dr Lalhlimpuia, CMO leh Dr Doris Lalnunmawii Sailo, DMS atangin Covid Care Centre, Dedicated Covid Health Centre chungchangte leh test neih dan te ngaihthlak a ni bawk a ni.