No.68/2020-2021

Vawiin chawhnu khan DC Conference Hall, Kolasibah Covid 19 hri lak a inven nana Kolasib district chhunga Zonal Executive Magistrate te leh Essential Commodities Team te hmalakna hrang hrang thlirletna hun neih a ni a, Dr H Lalthlangliana, DC Kolasib-in he hun hi kaihruaiin, hmalak zel dan tur te sawiho a ni.

Dr H Lalthlangliana, DC Kolasib chuan chatlak lova mipui nitin mamawh zualpui lakluh a nih theih nan ruahmanna hrang hrang siam a nih thu a sawi a, mipui tana him si, bungraw mamawh phurtute tana awlsam tur si a kalphung neih a tul thu a sawi. DC chuan Covid-19 hri darh zel tur ven a ngaih laia hmun thenkhata khawtlang tana harsatna siam an awm thin chu pawi a tih thu sawiin uluk lehzuala khuahkhirna kalpui a tul thu a sawi a, feh tur a chhuak te pawhin Sawrkar thuchhuah zah hram hram a, a huho a kal thin lo tur a hrilhhriat leh a tul thu a sawi bawk a ni.

Pu Vanlalfaka Ralte, SP Kolasib chuan Kolasib district chhung a venhimna kalpui dan sawiin Vairengteah IR 30 leh MRP 31 an duty thu leh Bairabiah IR 46 leh MRP 15 an duty mek thu a sawi a. Zankhua a an duty thin thu leh Tlawng lui kam ah te pawh duty an awm thu a tarlang bawk.

He hunah hian Dr Lalhlimpuia, CMO Kolasib pawhin Quarantine a awm te dinhmun a that thu te, rilru lam thiam ten an vil reng thu te, kohhran hruaitute pawhin a tul ang a hun an hmanpui thin thu te leh Quarantine a awm te pawhin an hlawkpui hle niin a sawi bawk a ni.

Vawiin thutkhawm ah hian Kolasib district a Ratio card neilo chhungkaw awm zat ziahluh tawh te enho a hmalak zel dan tur te sawi ho a ni a, Zonal Executive Magistrate te leh Essential Commodities team te an tel a ni.