Vawiin khan Kolasib DC Pi Niharika Rai, IAS chuan Kolasib Hindi Prachar Sabha kum 50 tlin lawmna, Parish Hall-ah a hmanpui a. Thuchah sawiin, tun dinhmunah Hindi thiam hi kan mamawh hle a ni, a ti.
Pi Rai chuan Kolasib Hindi Prachar Sabha in Golden Jubilee hial an hmang thei chu a lawmpuizia a sawi a. Hindi hi a pawimawh em em a, kan state kawtchhuah kan thlen atangin thiam kan mamawhzia alo lang thin a. Chuvangin India ram hmun khawi pawha lungmuang taka kan tlat theih nan leh hnam chi hrang hrangte kan inunau theih zawk nan Hindi hi uar takin kan zir tur a ni, a ti. Kei pawhin Hindi hi pawl riat thleng ka zir ve a. Hindi pawimawhna hi kan hre tulh tulh dawn a. Chuvangin vawiina a zir mekte pawn thiam tak tak tumin bei ila. Thangthar zawkte pawn uar sauh sauh ang u, a ti a ni.
Major Khurana, CIJW School chuan khual zahawm niin he hun hi a hmanpui bawk a. Mizoram Hindi Prachar Sabha Senior Adviser Pu VL Nghaka chuan Kolasib Hindi Prachar Sabha golden Jubilee hi a hmanpui bawk a ni.
Kolasib Hindi Prachar Sabha hi kum 1962 khan din a ni a. Heta zir chhuak hi an thahnem tawhin Sawrkar hna leh Missionary hna thawk engemaw zat an awm tawh a ni. Tun dinhmunah Mizoramah Hindi College 1 awmin Training College a awm bawk a, hetah hian kumtin B. Ed leh Diploma 160 an training thin. Prachar Centre 35 awm mekin Vidyalaya 64 leh BA thleng zirna 18 a awm bawk a ni.
