470/2026-2027

Kolasib, 12th May, 2026: Ni 8 May, 2026 (Zirtawpni) khan PHED Chief Engineer, Zone-I Er. Lalropuia leh Chief Engineer, Zone-II Er. K. Zohmingliana te chuan Kolasib leh Bairabi khaw tana Tlawng lui (Bairabi hrul) atanga tui lak theih dan tur a hmunah kalin an enfiah a. He hunah hian Er. Lalrosangi, Sr. Executive Engineer, Kolasib WATSAN Division, PHED bakah SDO leh JE ten an lo tawiawm a ni.

India sawrkar dan (norms) ah chuan Kolasib leh Bairabi te hi khawpui (Town) an nih avangin mi pakhatin nitin tui litre 135 an dawng tur a ni a. Tun dinhmunah Kolasib tana tui lak mekna Tuichhuahen atang chuan he tiang zat tui hi pek chhuah theih a nih hmel loh avangin, Tlawng lui hi rawn lak tel (pump) nise tih ngaihtuahna hi a lo awm tawh a ni.

Ruahmanna tlangpui ang chuan, Zamuang panna lei (bridge) bul vel atangin Tlawng lui tui hi pump tur a ni a. Bairabi khaw chung remchang hnaivaiah, Bairabi a luang thleng thei tur hmunah vawrh chhoh phawt beisei a ni. Chuta tang chuan Bairabi khuaah awlsam takin tui hi a luang thleng mai dawn a ni. Kolasib lam ve thung chu tui vawrh chhohna hmun atang hian Tuichhuahen Pump House awmsa bul hnaiah kilometer 23 vela thui pipe hmangin lak luh a ni ang a. Tuichhuahen atang hian Kolasib-a Pioneer Tlangah vawrh chhoh leh tur a ni dawn a ni.

He ruahmanna thar hi a puitling a nih chuan, tuna Kolasib tui pump mek chu hlui hlawn chuang lovin, a pahniha hmang kawpin Kolasib leh Bairabi mipuite chu kum 2058 (kum 30 lo awm tur) thleng harsa lo leh hnianghnar taka tui chawm thei tura beisei a ni.

He project lian tham tak atan hian a tlem berah cheng vaibelchhe 205 (Rs. 205 crores) vel mamawh tura duan chhin a ni a, detailed survey leh estimate siam a nih hunah a la pung thei bawk a ni. Sum mamawh zat a tam tham avangin sum hmuhna tur dap hna hi nasa taka thawh a la ngai dawn a. PHED chuan Kolasib leh Bairabi mipuite tana he project hi tihhlawhtlin sak ngei tumin theihtawpin hma a la chho mek a ni.