3691/2024-2025

Dated Kolasib, the 6th January, 2025: Vawiin chawhma dar 11:30-a tang khan Mizoram Journalists Association (MJA), Kolasib District-te chuan Kolasib Press Club-ah Annual Conference an nei.

Kolasib MJA Annual Conference hi chawhma lamah Annual reports sawihona leh rorelna hun chu President Pu Andrew Vanlalauva kaihhruainain hman a ni a. Kolasib District chhunga National Highway siam that mek leh Four Lane kawngpui siam chungchangah chak zawka hma lak a nih theih nan MJA-ten a tul angin bawhzui ni se tih te; Kolasib District chhunga ramri duty Police-te an dinhmun zir chiang tura a hmuna tlawh ni se tih te; Kolasib Press Club sak mek chu kumina hawn hman ngei turin chak taka hma lak ni se tih te leh District MJA-ten kumin chhungin fehchhuahna hun neih ngei ni se tihte an rel.

Chawhnu lamah hun hnihna hman niin, Vice President Pu C. Zomuanpuia'n inkhawm a kaihruai a. Pu H. Lalramliana, SDO(S), Kolasib chuan khuallian niin hun a hmanpui.

He hunah hian President Pu Andrew Vanlalauva chuan Presidential address sawiin, MJA-te chu ram leh khawtlang tana tangkaina nei thei pawl a nih angin member-te intuaithar zel a pawimawh a, thiamna thar lo chhuak zelah media mite chu an hnathawhna kawngah tunlai thiamna thar hmang tangkai tura inzir peih a ngai a ni a ti a. Kum 2025 lo thleng hi Kolasib MJA member-te lungrual taka thawkho a, ram leh khawtlang tana ke penho turin a sawm bawk a ni.

Pu R. Lalhmingthanga (Masena), Executive Member chuan 'Changing Nature of the Press' tih thupui hmangin paper a present a. Khawvel hmasawn zel leh kalphung danglam zel kara Press mite dinhmun leh hriat tur a sawi a. Digital age-ah nunphung a inthlak rualin Press mite dinhmun leh hnathawh dan a inthlak chho zel a, chumi avang chuan keini pawh kan inher rem ve zel a ngai a ni a ti a. Mipuiten news rang zawk leh chiang zawka news an beisei tawh avangin kan thu thar thehdarh dan kalphung pawh a danglam lo thei tawh lo va. Journalist-te chuan rin tlak leh rin ngam kan nihna vawng nung turin intuaihriam a, inzir a, media thar hmang thiam leh hmang tangkai tura theihtawp kan chhuah a ngai a ni a ti bawk.

Khuallian Pu H. Lalramliana, SDO(S), Kolasib chuan Journalist huangchhunga a hun hmasa lam a hman tawh dante chu MJA member-te hnenah share-in, Journalist hna chu hna zalen, hna nuam leh pawimawh tak si a ni a ti a. Kan chhehvela thil thleng, dik leh felfai taka la khawm a, mipuite hriat tura puanchhuah leh chu Journalist hna a nih avangin mipuite rilru sukthlek tidanglam thei a nih avangin a pawimawh hle a ni. Thu dik lo puan chhuah avangin thil tha lo a thleng fo tawh a. Journalist-te vangin buai lo tur a buai thei a, buai tur a fel thei bawk a ni. Chuvangin, journalist -te in taimak a ngai a, finfiah ngam news in puan chhuah a pawimawh a ni a ti bawk.

Khuallian chuan Mizote zingah fa nei tam duh kan tlem zel a, kum tin mitthi kan pun laiin, nau piang kan kiam zel a, hei hi ram leh hnam than zelna tura harsatna min thlentu a ni dawn a. Fa nei tam tura inzirtirna kawngah MJA-ten hma lak a tul. Kan district-ah pawh piang kan tlem zel a, ngaihtuahna kan sen zel a tul takzet a ni a ti bawk.

Pu Zairemchhunga, Information Secretary-in lawmthu sawiin hun a khar a. Kal khawmte hian zanriah an kilho nghal bawk a ni.