Zirlai naupang ten zirna kawng an zawh zel dan tur an thlan thiam theih nan a Kolasib Officers Club (KOC) ten an buatsaih Career Guidance Campaign, 2016 chu vawiin khan Parish Hall, Kolasib-ah School Education Minister Pu H.Rohluna'n a khar.

Career Guidance, 2016 inkhawmah hian Pu H.Rohluna chuan Kolasib Officers' Club ten zirlai te hmakhua ngai a, an kawngzawh tur an thlan thiam theih nana thahnemngaitaka hma an la chu chhuanawm a tih thu leh lawmawm a tih thu a sawi a. District dang te pawn KOC tihdan entawna hma an lak ve a beisei thu a sawi. Zirlai te pawn kawng kawhhmutu tha tak an nei chu an vanneihzia in hria a, an thu ngaihthlak te zawm tura fuihin, tum mumal tak nei chunga zirlai zir turin a fuih a. Pakhatna nih mai te duhtawk lo a state dang zirlai te nena inel pha tura mark sang tak hmu thei tura tang tur leh thiamna tak tak pawchhuak thei turin zirlaite a fuih bawk. Minister chuan Kolasib District a zirnain hma a sawn nana Deputy Commissioner hova district a officer awmte hmalakna hrang hrang chu fakawm a tih thu a sawi lang bawk.

Career Guidance, 2016 kharna inkhawm hi Pu C.Lalzahngoa, SP Kolasib leh KOC president ni bawk in a kaihruai a, Pu R.Lalnunzira, DAO leh Vice President, KOC in campaign neih dan kimchang report a pe a ni.

Career Guidance Campaign, 2016 hi kumin September atanga tan niin, Kolasib Town Area chhunga school hrang hrang pasariah neih a ni a. Vawiin khan Parish Hall, Kolasib ah High School pali te tan neih leh a ni. KOC member te atangin Pu C.Vanlalmawia, Principal DIET, Dr.Lalhruaitluangi, Core Faculty, SIRD, leh Pu Lalhmingliana, SDO(C) Kawnpui ten zirtirna hi an pe thin a. Career guidance programmeah hian sorkar hna leh hna hrang hrang danga luh dan te, mahni thiam zawng tihpuitlin nana hmalak dan hrang hrang te bakah sex education zirlai te hrilh thin an ni a. Zirlai te chu mahni inrintawkna nena an zirlai zir thin tur leh taima taka bei tur a fuih thin an ni bawk. KOC hian member te thawhkhawm atangin mi harsate tanpuina te an buatsaih thin bawk a ni.