Kolasib Officers’ Club (KOC) buatsaih Career  Guidance Programme, 2017 hawnna vawiin khan Diakkawn YMA Hall-ah neih a ni a, Pu Joseph Lalhimpuia, Parliamentary Secretary in a hmanpui. 

Pu Joseph Lalhimpuia chuan KOC ten mahni insengsoa naupang te hmangai  a career guidance programme an buatsaih chu fakawm a tih thu a sawi a, District dangah pawh chin ve atan a duhawm takzet a ni a ti a. Kolasib chu tun dinhmunah Mizoram chakkhai lakna luhka ber a nih avangin a pawimawh a, amaherawhchu hmasawnna kal zelah rel kawng sial mek te leh khawchhak lam ram nena insumdawn tawnna atana kawngsial mekah Kolasib District kaltlang lovin chakkhai lakluhna a awm  belh dawn avangin heng hun atan hian mahni theihna kan lo tahhriam a pawimawh a ni a ti a. Kolasib District chu ram zawl nuam tak a nih avangin Agriculture, Sangha dil, horticulture leh eibar zawnna dangah theihna sang tak a awm a, taima tan leh remhre tan chuan eizawnna ngialnghet tak neih theihna a nih thu a sawi a ni. 

Pu Joseph Lalhimpuia chuan zirna lamah sorkar chuan 'Quality Education' tih hlawhtlinna atan hma a la zel a ni tiin, zirlaibu pawh India ram hmundang te zirlai tlukpui a siam a nih thu a sawi a. Zirtirtute recruitment rules pawh mumal taka siam a ni tawh tiin, zirna tihmasawn tura zirtirtu thahnemngai tak tak an awm laia a titha peihlo lo awm thin avanga zirna hmai a bal thin chu pawi a tih thu a sawi a. Sorkar School nil result nei thin te chungah sorkarin hma a la zel dawn a ni a ti a.  Sorkar School a zirlai  naupang nei tura thahnemngailo leh neihloh pawisalo zirtirtute chungah dan angin hmalak zel a ni a ti bawk a. Hei bakah hian  Hostel Rules pawh mumal tak siam a ni bawk a ni a ti. 

Parliamentary Secretary chuan Zirlai te KOC thahnemngaihna hrethiam a, zirlaia thahnemngai tura chahin, sorkar hna chauh nilo private establishment hrang hrang te bakah mahni kea din theihna hna tam tak a awm a ni tih hria a, hlawhtling tur chuan insumtheihna leh taimakna chiah an mamawh a ni tih inhrethar turin a chah a ni. 

Kolasib Officers’ Club hi Kolasib a sorkar hnathawk a awm intelkhawm an ni a. Kum 2015 atang hian career guidance programme hi buatsaih tanin, Kolasib Town huamchhunga High School leh Higher Secondary School ah te kalchilhin zirtirna an pe thin a. Heng Competitive Examination hrang hrang atana inbuatsaih dan turte, Medical leh Engineering line a kaldan tur te, leh tleirawl te hriattur zirtirna pawimawh tak tak leh infuihphurna hun neih thin a ni a. Kumin 2017 hian hma zau zawka lak tumin, Kolasib Town huamchhung chauh nilovin Kawnpui, Bilkhawthlir leh Vairengte ah hun hman tum a ni a. Resource person tur  inruatin zirtirna hrang hrang pek tum a ni bakah KOC member atangin naupangte fuihphur tur leh cho chhuak thei turin tawnhriat inhrilhna hun hman thin a ni bawk ang. Kumin hian training line hrang hrang bakah soft skills lam te zirtirna uar tum a ni bawk. 

Career guidance programme hi Pu C.Lalzahngoa, SP leh President KOC ni bawk in kaihruaiin, Pi JH Lalparmawii, DIPRO leh Financial Secretary KOC ni bawk chuan kumina Career Guidance Programme kalpui dan tur kimchang report a pe a. Dr. Lalhlimpuia, Chief Medical Officer leh Pu G.S. Zaithantluanga, President, MISSTA Kolasib Sub-Hqtrs ten zirlai te hriattur pawimawh hriselna lam hawi leh fuihna thu an sawi a ni.