1167/2026-2027

Kolasib, 24th June, 2026: International Day against Drugs Abuse & Illicit Trafficking denchhenin vawiin khan Kolasib Town chhunga High School leh Higher Secondary School hrang hrangah Ruihhlo Do Campaign neih a ni. He  ni denchhen hian Pu David A. Lalhmingchhuana, DIPRO leh Pi Ngurzampuii , Superintendent, DC office ten school hrang hrangah kal kual in naupangte hnenah ruihhlo that lohzia an zirtir a ni .

Deputy Commissioner, Kolasib District in ruahmanna a siam angin, vawiin hian St. Johns HSS, CZ HSS, Kolasib H/S, Hmarveng H/S, Vengthar Secondary School, Sussane Downs Boarding School leh St. James HS ah te zirtirna hun hi hman a ni a. He hunah hian zirlai naupangte chuan ruihhlo laka fihlim tur leh theihpatawpa ruihhlo do turin thutiam an sawirual a, hei bakah hian signature campaign neih a ni a, ruihhlo ti ngai lo tur leh fihlim tlat turin an hming an sign nghal bawk a ni.

Heng ruihhlo do beihpui thlakna hrang hrangte hi Nasha Mukt Bharat Abhiyaan (NMBA) kalphung hnuaia kalpui a ni a. Nasha Mukt Bharat Abhiyaan hi India ram pum atanga ruihhlo umbo nana sawrkar laipui hmalakna lian tak a ni. He hmalakna hnuaiah hian ruihhlo that lohzia inhrilhhriatna leh zirtirna uar bika kalpui nan 'Nasha Mukt Saptah' (Ruihhlo do hapta) hman thin a ni a, kuminah pawh he hapta pual hian Kolasib-ah hmalakna hrang hrang kalpui chhoh mek a ni.

Ruihhlo do campaign kal zelah hian hmachhawp hrang hrang ruahman a  ni a. Heng zingah hian kawngzawh (Walkathon) te, mipuite zirtirna atana Awareness Concert te, intiamkamna (Pledge taking) te bakah, Kohhran thalaite hnena ruihhlo that lohzia sawina te leh TNT ah te hun hmang tura ruahmanna siam a ni.

 Naktuk June ni 25, 2026 hian Diakkawn H/S, CM High School, H.T High School leh Saidan Sec. School ah te hun hman chhunzawm leh a ni ang.