Kolasib Town Road Development Coordination Committee chu vawiin khan Dy. Commissioner Pi Niharika Rai IAS kaihhruainain a office chamber-ah an thukhawm a. Kolasib khawpui chhung kawng siam hna kal mek UD&PA kaltlanga NBCC leh Contractor hnathawhte an thlir let.

Meeting hmasaa tarlan tawh Kolasib kawngpui siam hna thawh zawh hun tura tih December 2009 a thawh zawh a nih loh avanga thil man sang chho zelin a hrin chhuah nia sawi kawng, 6Kms a thui thawh theih loh chungchang chu DC chuan tha a tih loh thu meeting ah hian a sawichhuak a. Hun tir lama Memorandum of Understanding an lo ziah tawh in hemi chungchang hi chiang taka a lo sawifiah tawh, ‘hna chungchangah thil tih danglam emaw a huna thawh zawh loh emaw a awm chuan NBCC in mawh a phur ang’ tih hian 6Kms a thui kawng hi NBCC thawhzawh tur a ni, tih a tichiang a ni, a ti a. Chuvangin hei hi cut mai theih a ni lo, a ti. He thil hi sawizauna neih anih hnu in Pu Andrew Lalhruaia chuan sorkara 6Kms cut dilna chu pawmpui anih thu committee hi a hriattir a. DC chuan hemi chungchang hi amah ngeiin cut lo tura sorkar a thlen leh a tum thu sawiin pawmpuina lehkha pawh a hnena pe turin Department hotute a hriattir nghal a ni.

Kolasib khawchhung kawng siam hna hi Pakage I leh II ah te then a ni a. Pakage I ah hian kawng 17 awmin hengte hi december 2011 a zawh hman tura tih a ni a. Pakage II ah hian kawng 22 awmin June 2012 a zawh tura tih a ni. Kawng siam hna kal mek hi UD&PA, Jt. V/C leh NBCC ten a huhova an endik tawh chu tha thawkhat mahse zing zawka endik committee chuan tha a ti a. Hemi ti tur hian veng tina V/C te chu an huamchhunga kawngte lo endik ngur tura tih an ni a, an thil hmuhte chu Jt. V/C hnena an hrilh hnuah Co-or. Committee hnenah an thehlut leh a ni dawn a ni.

Pi Niharika Rai chuan a hun taka hna thawh zawh a duh thu leh khua in rotling kawng a neih theih nana hna tha a duh thu committee ah hian a sawi a. PWD lam te pawhin endik hna fumfe taka an thawh theih nan NBCC chu an Work Plan committee a thehlut tura hriattir nghal an ni bawk a ni.