Kolasib Town Road Development Coordination Committee chu an chairman Kolasib DC Pi Niharika Rai hovin vawiin khan a office chamber-ah an thukhawm a. Kolasib khaw chhung kawng siam hna NBCC thawh dan leh chet lak zui dan turte an thlir ho a ni.

Tun dinhmunah Town Road hi NBCC hnuaia CZS Construction Company chuan an thawk zo thawkhat tawh a. Package II hnuaiah Culvert pahnih leh Nullah siamlai tihloh chu an thawk zo vek tawh a. Package I a hnate chu 22. 3. 2012 khan an zo tawh a ni.

Town Road Committee member te chuan vawiina Committee an neih zawh khan khaw chhung kawng te fang kualin Contractor te hna thawh chu an fang kual a. Kawng siam te chu an tha thawkhat hlein an hria a ni. Hetih lai hian DC Pi Niharika Rai, Chairman chuan Contractor ten an hna thawhna atanga an sum hman ban engemaw zat chu tangkai taka khaw kawng siam belh leh tih that ngaite tih that a nih theih nan chak takin hma a la a. A tul zualte thawh tur endikin Committee member tehi an vak chhuak nghal a ni. Committee lai hian DC chuan UDPA Minister Pu Zodintluanga be nghalin hnathawhna sum bangte Central Ministry a let lova hman tangkai dan ngaihtuahpui turin a ngen a. Hei hi chhangin UD& PA Minister chuan a tul anga hman tangkai nghal tura a ruahman tur thu DC hi alo hrilh a ni.