No.5553/2020-2021

Kolasib 29th September 2020: Vawiin chawhma khan DC Conference Hall, Kolasibah ‘Cleanliness Week 2020’ leh ‘Mizoram Cleanliness Competition 2020’ atan a inbuatsaih dan tur sawihoin Kolasib Town Sanitation Task Force te chuan thutkhawmna an nei a, Dr. H. Lalthlangliana, Deputy Commissioner in hun a kaihruai a ni.

Dr. H.Lalthlangliana chuan ‘Cleanliness Week 2020’ hawnna hun chu October ni 2, 2020-ah neih a nih tur thu leh Mizoram Cleanliness Competition 2020 inbuatsaihna nipah fawmin, kum tluan a kalpui tur a nih thu a sawi a,” Lawmman vang nilovin, fai duhna vanga kan hmalakna vang zawkin lawmman hi dawng chauh zawk ang u,” a ti a,” Solid Waste Management Centre peihfel tep a ni tawh a, bawlhlawh sawngbawl dan inkaihhruaina hman tan a ni tawh bawk a, Mizorama khawpui fai ber kan ni thei a ni,” a ti.

‘Cleanliness Week 2020’ hawnna hi Venglai Bazar, Kolasibah hman tum a ni a, ni 12 October 2020 atangin endikna kalpui tum niin ni 20, November 2020 hmain result thehluh tur a ruahman a ni bawk. Faina kawnga inelna hi chi hrang hranga then a ni a, Vengfai inelna, School leh College fai inelna, Office fai inelna, Bazar fai inelna, Hotel leh thingpui dawr fai inelna leh Hospital/Health care fai inelna te a awm dawn a ni. Mizoram Cleanliness Competition 2020 ah hian Vantlang inthiarna fai leh fai loh te, khaw chhunga bawlhhlawh leng vakte, Bawlhhlawh tawih thei leh tawih thei lo thliar hrante, faina kawnga inzirtirna neih dante, khawtlang anga faina kawnga hmalak dante, tui hawk luan kawr leh lui dung enkawl dante leh khawpui tih thianghlimna kawnga hmalakna tharlam awm dante chu tehfungah hman a ni dawn a ni.

He hunah hian Pu Gaston Vanlalhriatpuia, District Urban Development Officer, Kolasibin Cleanliness Week kalpui thin dan tlangpui a tarlang a, Pi Lalmuanpuii, Procurement Specialist chuan inelna kalpui dan tur sawi zauna hun a hmang bawk a ni. Cleanliness Week chhunga inelna endiktu turte ruatfel nghal niin lawmman chungchang pawh sawiho nghal a ni bawk.