179/2026-2027

Kolasib, 16th April, 2026: Vawiin khan Kolasib DC Conference Hall-ah Kolasib Bawrhsap (DC) leh Kolasib Town Sanitation Task Force  Chairman ni bawk, Pu H. Dolianbuaia hovin Kolasib Town Sanitation Committee an thukhawm a. He thutkhawmnaah hian Kolasib khawpui faina atana hmalakna tur pawimawh tak tak ngaihtuah ho a ni.

He hun kaihruaitu, Committee Chairman, Pu H. Dolianbuaia chuan thu sawiin, kum tin Mizoram pum huapa Khawpui Fai Inelna (Cleanliness Competition) buatsaih thinah Kolasib-in theih tawpa tan a lak a ngaih thu a sawi a. Pakhatna dinhmun luah thei turin mipui te inpekna a pawimawh thu a tarlang. Faina bakah khawtlang tichhetu ruihhlo do kawngah pawh mitin ten mawhphurhna la a, theih tawp chhuaha tan kan rual a tul hle a ni, a ti.

Kolasib District-in theihna (potential) a neih that zia tarlangin Bawrhsap chuan, "Kan leilung thatna te, thlai leh sangha tharchhuah kawngah te hian theihna kan nei tha hle a, heng kan thil neih thatte hi kan phochhuak (promote) tawk lo thin. Tourism lamah pawh hma sawn turin heng kan theihna te hi kan hman tangkai thiam a, tan kan lak thar a ngai a ni," tiin kalkhawmte a chah bawk.

Thutkhawmnaah hian Kolasib khawpui faina leh bawlhhlawh sawngbawl dan tur chungchang chipchiar taka ngaihtuahho a ni a. Hman khat daih plastic (Single Use Plastic - SUP) hman khap a nih thu uar zawka mipui zirtir nise tih a ni a. Bawlhhlawh a hmun lova paih te, a tawih thei (biodegradable) leh tawih theilo (non-biodegradable) mumal taka thliar hrang lo te chu Kolasib Town Solid Waste Management Bye-Laws hnuaiah Rs. 5,000/- thlenga pawisa chawitir (fine) theih an nih thu tarlan a ni.

Tin, Dihmuntlanga Solid Waste Management Centre chu a enkawltu hlui te hun a tawp tak avangin, a thara enkawltu tur zawn a nih chhung chu DUDO office-in an enkawl rih dawn thu tarlan a ni bawk. Heng bakah hian, Mizoram Khawpui Fai Inelna-a Kolasib khawpuiin pakhatna dinhmun a luah theih nan Sawrkar Department hrang hrangte, Village Council (VC) te leh NGO hrang hrangte inlungrual taka thawhhona tha neih a pawimawh zia thuk zawka sawiho a ni.

Vawiin thutkhawmnaah hian Committee Chairman DC bakah hian, Pu Lalmuan puia, DLAO Kolasib, Pu H. Lalramliana, DUDO Kolasib leh Kolasib khaw chhunga veng hrang hranga Village Council President leh an aiawhte an kalkhawm a ni.