‘Faina Hapta’  Kolasib- a hman chu vawiin khan khar a nita a, hapta chhunga veng fai endikah College Veng chu veng fai berah thlan a ni.  Veng fai ber dawttu hi Project Veng a ni a, pathumna chu Thingdawl Chhim Veng a ni.

Faina Hapta kharna inkhawm hi UD&PA Hall, Brig. Vankunga Shopping Centre-ah neih a ni a. Pi Maria CT Zuali, Project Director, DRDA chuan khuallian niin a hmanpui a. Thu sawiin Pi Maria CT Zuali chuan faina kawngah hian Mizoten zir tur kan ngah hle a. Mahni mimal faina, (personal hygiene) te hi naupangte kan nih lai atanga kan tan a ngai a.

Kan inchhung tihfai kawngah pawh hma kan sawn deuh deuh a ngai a. Mobile phone tha tak tak nei thei in Bawlhhlawh bawm changkang kan la hung theilo hi chu kan inenfiah a ngai a ni, a ti. Polythene hman tlem mi tinten tum ila, kan bawlhhlawh paih danah pawh a tawih thei leh thei lo thlliar hran ching ila, kan in leh a vel bakah vantlang hmun kawr leh a vel te sarang tawih theilo ten a hnawh loh nan bawlhhlawh paih ‘I fimkhur theuh ang u’,  a ti a ni.

Pu Andrew Lalhruaia, DUDO, UD&PA chuan hapta kharna inkhawm hi a kaihruai a , Pu C.Lalmalsawma, IS-in report a pe a ni. Hapta chhunga inelna dang lawmman latute chu – Govt. Office fai ber DIET, 2-na DAO leh 3na PD, DRDA te an ni. School (H/s & above) fai ber Hmar veng H/S, 2-na Govt. Kolasib H/S leh 3-na Govt. Diakkawn H/S te an ni a. School (M/S below) fai ber St. Maria Goretti’s school, 2-na Thingdawl Vengthar M/S leh 3-na P/S VII, Gorkhali School te an ni.

Kolasib-ah hian kum 1989 atang khan Faina Hapta hman tan alo ni tawh a. Thiamna hmanga bawlhhlawh tihralna Solid Waste Management ti turin Kolasib chu pilot project, a hmahruai tura thlan a niin tunah hian hma lak tan mek a ni.