4693/2025-2026

Kolasib, the 3rd March, 2026: Cheng nuai 601 chuang senga hmalak mek 'Augmentation and Extension of Distribution System of Kolasib Water Supply Scheme' hnuaia Kolasib main feeder road-a pipeline phum ṭanna tur chu vawiin khan Er. Lalrosangi, Sr. Executive Engineer, PHE Kolasib WATSAN Division chuan a pisa-ah a hawng.

Kolasib tui lakna tihchangtlun hna kalpuiah hian veng ṭhenkhatah pipe phum tawh niin, Khuangpuilam aṭanga Diakkawn Square thleng booster line phum zawh a ni tawh a. Tunah hian Diakkawn aṭanga Hmarveng thleng pipeline 150mm leh 100mm a lian phum leh tur a ni. Pipeline phumna tur hian kawngpui laih a ngaih dawn avangin mipui nunphung leh lirthei veivahna a tibuai thei dawn a. Hei bakah hian vaivut khu a awm dawn avangin mipuite chu dawhthei taka lo nghak hram hram tur leh, department hmalakna lo ṭawiawm turin Sr. EE Er. Lalrosangi chuan a ngen a ni.

AMRUT 2.0 hnuaia Rs. 6,01,90,000/- hmanga thawh mek hian Kolasib water supply scheme chu kawng hrang hrangin a tichangtlung dawn a. Hemi hnuaiah hian main reservoir aṭanga veng hrang hrang zonal tank-a tui pekna line thlak te, tui pump-na khawl thar bun te, water treatment plant-a filter media thlak te, khawchhunga tuizem thar siam belh te, Khuangpuilam tuizem a tui dah luhna pipeline tam zawk chu pipeline thara thlak te leh, khawchhung veng hrang hranga pipeline hlui tawh leh te lutuk te chu tihlen leh a thara thlak hna thawh a ni ang.

Vawiina pipeline phum ṭanna hunah hian pipeline in a paltlang tur veng hrang hrang VC-te, Sub Hqrs. YMA hruaitute leh Kolasib MJA aiawhte an tel a. PHE Department aṭangin SDO Pi Cindy Vanlalnghaki bakah JE pahnih Er. Joseph Lalthlamuana leh Er. James Lalbiakliana te an tel bawk a ni.