404/2022-2023

Kolasib dated 5th May, 2022: Vawiin chawhma khan Pu John LT Sanga, Deputy Commissioner, Kolasib district hovin District Level Committee on African Swine Fever & other Transboundary Animal Diseases (TADs) chuan DC Conference Hall-ah thukhawmna an nei a.  African Swine Fever leh ran natna ramri kaltlanga inkaidarh theih hrang hrang venna tur a hmalak dan tur an sawi ho a ni.

Chairman Pu John LT Sanga, Deputy Commissioner chuan African Swine Fever avanga vawk vulhtuten Mizoram hmun hrang hranga harsatna nasa tak an tawh mek lai a Kolasib district chu a tuar nep ber pawl kan la ni thei chu District AH&Vety-a thawktute hmalakna vang a nih thu a sawi a. Hrileng ven hautak tak a nih avangin Department hrang hrangte nen thawhhona țha neih chhunzawm zel a pawimawh thu a sawi. Deputy Commissioner chuan Kolasibah khawmpui lian thlen lai a nih avangin sa mamawhna pawh a san lai tak a nih thu sawiin mihring ei atana sa hrisel chauh talh a nih theih nana AH& Vety Department thawktuten endikna uluk taka an kalpui chu lawmawm a tih thu a sawi bawk a ni.

Dr. Engkunga Chhangte, DVO chuan African Swine Fever hriin Mizoram a luh chilh hnuah Kolasibah he hri vanga thi vawk 158 a awm thu sawiin District dang nena khaikhin chuan a tlem ber pawl a nih thu a sawi a. Hemi avang hian he hri avanga Mizoramah vawk sa indaih lohna avanga harsatna awm theih te sutkian a nih theih nan Kolasib district chu a pawimawh hle thu a sawi bawk a ni. DVO chuan Kum 2022 chhunga ASF vang a vawk thi rinhlelh ațanga sample 8 endik chu a Negative vek thu a sawi a, chutihrual chuan March ațanga May, 2022 chhunga vawk thi 319 awm chu Classical Swine Fever hri vang a nih theih thu a tarlang.

Vawiin țhutkhawmah hian Kolasib district chhungah kum 2021 khan AH & Vety, FOCUS leh MzSRLM țangkawpin Classical Swine Fever vaccine 5322 pek a nih thu leh vawkpui 2405 kah rai ațangin vawk note 10739 an awm mek thu sawi a ni a. Classical Swine Fever vaccine hi vawk note thla 3 hnuai lam leh vawk rai laiah pek theih a ni lo a, Kolasib district-a vawk thi chhinchhiah tam zawk chu he vaccine la lo an nih thu tarlan a ni bawk.