1213/2025-2026

Dated Kolasib the 17th July, 2025: Vawiin khan UD&PA Conference Hall, Brig. C. Vankunga Shopping Centre-ah 'Clean Home Door to Door on SABB & Supply of Clean Drinking Water' Campaign hun hman a ni. He hun hi Pu Zothanthanmawia Hrahsel, Manager, DAY-NULM in a kaihruai a, Pu Robert C. Lalhmangaiha, Deputy Commissioner, Kolasib District chu khuallian a ni.

He hunah hian Kolasib Bawrhsap Pu Robert C Lalhmangaia chuan thu sawiin, SABB leh Tui intur thianghlim campaign neihna tura hmalakna chu a fakawm tih a sawi a, tunhnaiah faina kawngah Kolasib DUDO leh a thawhpuiten theihtawp an chhuah thin avangin lawmthu a hrilh bawk. Bawrhsap chuan faina kawngah hmasawnna a awm theihnan sorkar angin department chuan theihtawp an chhuah thin a, mipuiten department hmalakna leh an thahnemngaihna kan tawm a ngai tiin Kolasib chu district fai leh thianghlim ber ni thei tura tan la turin kalkhawmte a sawm a ni. Tunhnaiah District khawpui fai inelna hrang hrangah Kolasib chuan lawmman a dawng hleithei lo chu a pawi tih a sawi a, faina kawngah chhungtinten tan kan lak a ngai a ti.

Hemi rual hian Kolasib mipuite tuitlan hnar enkawl dan pawh a lungawi thlak loh tih a sawi a, bawlhhlawh senghawi leh dah bo kawngah pawh department chuan theihtawp a chhuah a, he hmalaknaah hian sorkar lam atanga tha kan thawhna hi mipuiten hria in kan zawm ve a ngai tiin VC, NGO leh kohhran ang pawha faina lam in zirtir nasat a ngai tih a sawi. Hei bakah nitin mai Kolasib-ah ui seh vanga hospital panpui ngai an awm ziah chu in enfiah a ngai a, mahni ranvulh khuahkhirh kawngah tan la turin mipui a chah bawk.

Kolasib DUDO Pi Josephine Zonunsangi pawhin tun tuma 'clean home door to door' leh 'Supply of clean drinking water' campaign neih turah chuan SHG member te chu ambassador an nih thu leh anmahniah inelna thianghlim siam a ni dawn tih a sawi a, campaign thupui ber atan Kolasib town area tihfai chu ngaihpawimawh a tul tih a sawi. Kum 2018 khan khawpui fai inelnaah Kolasib chu top 4-ah a lang tawh a, a hnu lamah chuan top 5 ah lan kan nei tawh lo tiin khawpui fai ni thei turin SHG te chu campaigner pawimawh an ni tih a sawi.

He hunah hian SHG nu ho kohkhawm an ni a, an ni hian Kolasib khawpuia in tinah lutin campaign hi an nei dawn a ni. Zonu ALF ten kalkhawmte zaiin an awi a, Pi H. Lalremruati, Manager, DAY- NULM chuan Campaign neih dan tur a sawifiah bawk. 

Vawiin hunah hian Pu David A Lalhmingchhuana, DIPRO, Kolasib te, Pu H. Lalbiakthanga, President ZPM Kolasib block te, Pu C. Zomuanpuia, MJA Kolasib ten thu an sawi a, Pu Obeda Lalhuliana, Inspector of Sanitation chuan 'Faina thutiam' lakna a kaihruai bawk a ni.