No.4138/2021-2022
Aizawl dated 1st March 2022: Vawiin chawhma khan Salem Clinic, Diakkawnah Dr.H.Lalthlangliana, Deputy Commissioner, Kolasib district chuan ram puma zeng hri danna pek beihpui, Intensified Pulse Polio Immunization Program chu kum 2022 chhunga Kolasib district-a kalpui tan turin a hawng.

Dr.H.Lalthlangliana chuan zeng natna chu thawktute inpekna leh mipuiten zeng hri danna lak an ngaih pawimawh avangin tun ah chuan a natna vei hmuh tur an awm tawh loh thu a sawi a. Hetiang bawk hian tun a hrileng mek, Covid-19 chungchangah pawh vaccine lak ngai pawimawh a, naupang hnen a pek tur vaccine a awm hunah pawh la hmasatu nih tum theuh turin vawiina nu leh pa kalkhawmte hnenah a chah bawk a ni.

Hun kaihruaitu Dr.Lalawmpuia Chhangte, CMO Kolasib district chuan Zeng hri chu India ram pumah um bo tawh ni mah se kan ram thenawmah he natna vei hmuhchhuah a la nih thin avangin naupang kum 5 hnuai lamah hri danna hi kalpui reng a ngaih thu a sawi.

Dr.R.K.Lalthlamuana, District Immunization Officer tarlan danin Kolasib district chhunga naupang kum 5 hnuai lam 9063 hnenah kumin IPPI kalpui chhung hian hri danna hi pek tur a ruahman a ni a. Vaccination Booth 102 bakah High Risk Area hmun 10 leh Transit Point hmun 2 kaltlangtein vaccine hi pekchhuah a ni dawn a ni.