1817/2022-2023  
Kolasib dated 5th September 2022: Tukin khan Kolasibah ‘Teachers’ Day 2022’ puala zirtirtute chawimawina kawngzawh buatsaih a ni a. Venglai Bazar-ah Pu John LT Sanga, Deputy Commissioner chuan zirlai kalkhawmte fuihna thu sawiin Pu P.C.Lalngaizuala, District Education Officer chuan hun a kaihruai a ni.

Deputy Commissioner Pu John LT Sanga chuan September ni 5 chu zirna ngai pawimawh tak leh zirna tihhmasawn nana thawhhlawk tak, India ram Vice President hmasa ber leh President pahnihna, Dr. S. Radhakrisnan piancham a hman thin a nih thu a sawi a. Zirturtute chu zirlaite theihna leh thiamna tipung tur a mi pawimawh tak an nih thu tarlangin mi hlawhtling leh hmantlak ni tur chuan zirtirtute zah thiam leh an thu awih chu thil pawimawh tak a nih thu a sawi. Zirlaite mi puitling leh hmantlak a chherchhuak tur chuan Zirtirtu rintlak, ngilnei, inhawng leh inpekna thinlung pum mi an nih a pawimawh thu Pu John LT Sanga chuan sawiin ram leh hnam tihhmasawn zelna tur ah mawhphurna pawimawh tak an neih thu a sawi a. Kan ram leh hnam tan hma hun eng siam a nih theih nan tun huna zirlaite leh zirtirtute hian an mawhphurhna theuh hlenchhuak tura tan an lak a tul thu a sawi bawk a ni.

He hunah hian Pu C.Lalruatdika, President, MZP Headquarters, Kolasib pawhin zirtirtute thuawih leh zahna lantir a pawimawh zia a sawi a. Kolasib khaw chhung School hrang hranga zirlaite chuan zirtirtute chawimawina thuziak kengin au rualna hun, DC Office tualzawl, Kumtluang run, Vengthar leh Banglakawn-ahte kawng zawhin hun an hmang a ni.