593/2025-2026
Kolasib Dated 14th May, 2025 : Vawiin chawhma dar 11:00 khan Kolasib DC Conference Hall-ah District Consultative Committee (DCC) te’n District Level Review Committee (DLRC) for Quarter Ended March, 2025 an nei a. He hun hi Pu Robert C. Lalhmangaiha, Kolasib Deputy Commissioner leh District Consultative Committee Chairman ni bawk chuan a kaihruai a ni.
Pu Robert C. Lalhmangaiha chuan District Consultative Committee (DCC) Quarter tina neih thin chu a hlawkthlak a tih thu sawiin DCC dinchhan pawimawh tak pakhat chu sum dehchhuah dan leh a vawn that leh hmanna kawnga mipuite zirtirna pek a nih thu a sawi a. Hmun kilkhawr zawka khawsate ngaihsaka, khawtlanga chanhai zawkte khaichhuah kawngah theihtawp chhuah zel turin he thutkhawmna a tel DCC Member kalkhawmte chu a fuih bawk a ni.
Vawiina Kolasiba DCC thutkhawmnaah hian Pu S. Balamurugan, Assistant General Manager, Reserve Bank of India (RBI) leh Lead District Officer ni bawk chuan Reserve Bank of India Policy leh Guidelines-te sawizauna a neih bakah State Level Banker Committee chungchang sawizauna a nei a.
Pu PC Lalnunpuia, Lead District Manager chuan he hunah hian District Consultative Committee Agenda-te sawizauna hun a hman bakah, January 2025 atanga March 2025 chhunga Kolasib District chhunga DCC hnuaia Bank hrang hrangte hmalakna tarlanna hun a hmang a. Vawiina Kolasiba DCC Meeting neihnaah hian Kolasib District chhunga Financial Literary kalpui dante, Bank hmunhmaa venhimna kalpui dan turte, khawtlanga mi chanhai leh hnufual zawkte dawmkan dan turte, 100% Digitization kalpui dan turte, Farmer's Producers Organisation(FPO) leh an hnuaia Society dingte hmasawnna tur chungchangte, Loneitute leh Ranvulhtute hamthatna turte leh Central leh State Sawrkar hnuaia sum kaihhnawih Scheme hrang hrang mipuite hnena tha taka a thlen dan turte sawihona hun neih a ni a. Kolasib District 'Annual Credit Plan 2025-2026' tlangzarhna hun hman nghal a ni bawk.
Vawiin Kolasiba DCC Meeting neihna hian Pu JD Traite, District Development Manager, NABARD, Pu R. Lalnunpuia Sub-Divisional Police Officer (SDPO) bakah Sawrkar Allied Department atangin Agriculture, Horticulture, Animal Husbandry & Veterinary, Fisheries, Commerce and Industries Department-a hotute leh Kolasib District chhunga Bank hrang hranga hotute kim takin an kal thei a ni.
