2943/2024-2025

Dated Kolasib, the 12th November, 2024: Vawiin khan District Level Maternal and Child Death Review Meeting, Kolasib District chu an Chairman Robert C. Lalhmangaiha, DC Kolasib hovin, Deputy Commissioner Office Chamber-ah an thukhawm a. Kumin April atanga September thlenga Kolasib District a naupang thihna leh nau chunga nu thihna thlen dante leh hmalak dan tur te an sawiho a ni.

Vawiin a thutkhawmna kaihruaitu Kolasib DC chuan  naute leh nau chunga nu thihna awm thin chu a  vanduaithlakin a  tawrhpui takzet thu sawiin nu leh naute hriselna enkawl kawnga theihtawp chhuah zui zel turin kalkhawmte chu a chah bawk. 

He thutkhawmna ahhian vanduaithlak taka naute chunga thihna a thlen thin dante leh nau pai lai leh a hrin laia thihna thleng thei khawpa harsatna awm thei te, naute in an sen laia thihna thlen thei natna chi hrang hrang an tawh te leh an enkawl dan te sawi ho a ni a. CMO Kolasib leh District Hospital Kolasib atanga report a a lan danin Kolasib District chhungah nu leh naute inentir(check up) te,hri danna lak kawngah leh chaw tha (nutrition) dawn kawngah te hmasawnna hmuh chhoh zel a ni. Inzirtirna a tam thei ang bera kalpui niin mipui pawhin an zawm tha hle a, Nu a rai tirh atanga naute an lo than chhoh thlenga Inentir leh hri danna lak a pawimawh zia sawiho a ni bawk.

Report a tarlan a nih angin April - September 2024 chhungin Kolasib District mi, kum 5 hnuailam; naute 1 leh nausen(infant) 10 an thi a, heng zinga 7 hi ZMC leh Aizawl Civil Hospital a thi te an ni. 

Nausen thihna tam ber hi Pneumonia (4) niin a dawttu hi thla kimlo a piang(2) te an ni. Thutkhawmna neih zawh hian Koalsib DC Pu Robert C Lalhmangaiha chuan vanduaithlak taka naute thi nu te hnenah ralna a hlan bawk.

Vawiin a District Level Maternal and Child Death Review Meeting ahhian Kolasib DC bakah Dr RK Lalthlamuana,  Kolasib CMO, Dr Samuel Lalfakawma Fanai, Kolasib District Medical Superintendent te, Dr Saichhingpuii Sailo, Deputy CMO leh Kolasib District a hriselna lama thawktute leh vanduaina tawk chhungte an kalkhawm a ni.