1857/2025-2026

Dated Kolasib the 27th August, 2025: Vawiin khan I&PR Conference Hall, Project veng Kolasibah ‘District Level Red Ribbon Quiz Competition buatsaih niin he hunah hian Kolasib Bawrhsap Pu Robert C. Lalhmangaiha chu khuallian a ni a. Kolasib District chhunga School hrang hrangte’n Quiz Intihsiakna neiin Jonathan Lalremruata leh Joseph Lalthanmawia, Govt. Middle School, Kolasib zirlaite chuan lawmman pakhatna an la a ni.

Khuallian, Pu Robert C. Lalhmangaiha, District Bawrhsap chuan vawiin a Quiz inelna hun a kalkhawmte chibai bukin zirlai intihsiak turte duhsakna a hlan a. Naupangte chu nakina ram leh hnam hruaitu tur annih thu sawiin, nu leh pate tana innghahna tlak leh nunchang tha neih chu a pawimawh thu a sawi a. AIDS natna in Mizoram leh khawvel hmun hrang hrang a tihbuai nasat tawh dante sawiin, thalai tamtak in mual min liam san a, mi tam tak nun a chhe mek chu a pawiin khawtlang leh Sawrkar pawn a vei thu sawiin AIDS laka invenna tha ber chu mahni nun uluk a ni, a ti bawk. Kolasib DC chuan, Quiz hmanga inelna chu khawvel ngaihsan a ni thu sawiin hriatna lama inelna hian hmalam hunah nasa takin min pui theih thu sawiin hriatna tipung turin lehkhabu tha chhiar tam turin he huna kalkhawmte chu a fuih bawk.

He hun hi Dr.Ramdinthari, District AIDS Control Officer, Kolasib chuan a kaihhruai a. Pu K. Lalhmingsanga DIS, DAPCU chuan AIDS natna laka invenna leh zirtirna pawimawh tak takte sawina hun a hman bakah AIDS natna chungchanga Kolasib District dinhmun chipchiar takin a tarlang a. Hemi zawhah hian Quiz Master Pu Benjamin Lalhmachhuana, BRC Kolasib kaihhruaina in District Level Red Ribbon Quiz Competition neih chhunzawm nghal a ni a. Quiz Competition neih zawhah hian Pu Vanlalchhana, District Education Office, Kolasib hovin lawmman semna hun hman a ni bawk.

Vawiina Kolasib District Level Red Ribbon Quiz Competition neihna ah hian Sikul pakua – Chanmari UPS, Kawnpui; Lalfak Memorial High School, Kawnpui; Govt. Middle School, Kolasib; Saidan Secondary School; St. Maria Goretti’s School; Phaisen Secondary School; Govt. Diakkawn Middle School; Govt. Middle School, Saiphai leh Saipum High School te an tel a. Hetiang hi Result a ni:

1-na – Govt. Middle School, Kolasib
2-na – St. Maria Goretti’s School, Kolasib
3-na – Phaisen Secondary School

Vawiina District level Red Ribbon Quiz Competition a tel te hi District huam chhunga sikul hrang hrang 26 a intihsiakna lo hmachhawn tawh zinga a ti ṭha pakuate an ni a, District Level-ah hian an intihsiak leh a ni.

District level intihsiaka pakhatna te hi September ni 3 & 4, 2025-a state level intihsiaknaah District aiawhin an tel leh dawn a. An tih ṭhat dan a zirin National Level thlengin an tel thei dawn a ni.