815/2025-2026

Dated Kolasib the 11th June 2025: Vawiin khan Mizoram puma Green Mizoram Day 2025 hman mek chu Kolasib District ah pawh hman ve niin, Thingdawl community Hall ah Pu Lalfamkima, Deputy Speaker, Mizoram Legislative Assembly khuallianna hnuaiah hun hman a ni a. He hunah hian Green Mizoram Day puala “Ruahtui khawl nan thing I phun ang u" tih thupui hmangin thusawina hun te hman niin, program zawh ahhian JNV Thingdawlah Kolasib District a office hrang hrang ten thingphun hnatlang an nei nghal a ni.

Green Mizoram Day puala Thingdawl a hun hmanna ahhian Khuallian, Pu Lalfamkima chuan Green Mizoram Day pawimahna te sawiin, ramngaw humhalh leh thingphun uar chu hun rei tawh tak atanga kalpui tawh a ni a, rah tha tamtak pawh hmuh theihin a awm a, amaherawhchu awmze nei zawka kan kalpui a tul a ni, a ti. Khuallian chuan kan ramin a ngaih tur thing thlan thiam a pawimawh hle a ni tiin, hemi kawngah hian mithiam zawkte atanga thurawn lak a pawimawh takzet a ni, a ti bawk.

Ramngaw humhalh chhan ber chu  keimahni tan a ni , tiin,  thingphun ringawt duhtawk lo a , a enkawl zui lamah pawh tan lak a ngai a ni, a ti a. Tui renchem leh ruahtui khawl chungchang pawh sawiin, Mizoramah fur laiin tui a nut thin avang leh khaw tamtakin tui kan indaihloh thin avangin ruahtui khawl dan felfai zawk a neih chu a pawimawh hle a ni, a ti. Green Mizoram Day an hman chu a hlawhtlin theih nan theihtawp a tang ho turin kalkhawmte chu a chah bawk.

Khualzahawm, Pu Agni Mitra , IFS,CF(NC) ,EF&CC Mizoram pawhin thu sawiin, state danga a hmuh ngailoh Green Mizoram Day a danglam bikna chu Forest Department mai ni lovin, Department tin leh mipuiten an mawhphurhna ah la in an tang tlang a ni,a ti a. Heng te avang hian Mizoram chu India rama Forest cover sanna a ni zawm zel a ni,a ti. Pu Agni Mitra chuan Mizoram chu kan hriat theuh angin a hring sa a,amaherawhchu thing leh mau quality tha zawk, sik leh sa leh tuihna siam thei zawk phun uar kan mamawh a ni, a ti. Thingphun chu kan ram atana tun mai nilo nakin hun lola kal tur zel atana pawh malsawmna kan dawn zelna tur a ni, tiin thingphun uar lehzual turin kalkhawmte chu a sawm nghal a ni.

He Green Mizoram Day puala inkhawm kaihruaitu, Pu Robert C Lalhmangaiha, Kolasib DC pawhin thu sawiin, Green Mizoram Day hmang tura kalkhawmte chibai a buk a. Mipuite chu thingphun uar a, a enkawl zui pawh ngaihthah lova tuihnate ngaw hnuaia kan awmtir zel thei a nihchuan tui indaihlohna ah mizoram kan buai dawnlo a ni, a ti. Green Mizoram Day atana sawrkar hmalakna te chu a pawimawhzia sawiin, Forest Department mai ni lovin mitin in kan mawhphurhna a ni tih kan hriat a pawimawh hle a ni, a ti.

Green Mizoram Day pual hian District level fire prevention award sem nghal niin, lawmman dawngtute chu hengte hi an ni:

1. khamrang (Certificate leh Pawisa fai cheng 30000)

2. khuangpuilam (Certificate leh Pawisa fai cheng 20000)

3. Bilkhawthlir south ( Certificate leh Pawisa fai cheng 10000)

Thingdawl a Green Mizoram Day puala hun hman a nih hnu hian JNV Thingdawlah Kolasib District a office hrang hrang ten thingphun hnatlang an nei nghal a ni.