No.7501/2020-2021

Vawiin khan CMO Office, Kolasib-ah National Deworming Day  (rulhut dona ni) kalpui dan tur sawihona neih a ni. He hunah hian mihring taksa chhunga rulhutin nghawng a neih dan leh a dona kawnga hmalak dan tur sawihona neih a ni a. Rulhuthlo (Albendazole) chu a mamawhte hnena pek a nih theih nana hmalak dan tur sawihona neih a ni bawk. National Deworming Day pual hian Kolasib CMO hmalakna in kum 1-19 inkarte hnenah rulhuthlo an kum mil zela Kolasib District chhunga sem dan tur ngaihtuah a ni.

Dr. Lalhlimpuia, CMO chuan rulhut hian khumbet ngai khawp natna thlen loh mahse mihring taksaah thisen tlakchhamna a thlen theih thu a sawi a. Taksa chaklohna bakah naupang zirlaite an rilru leh ngaihtuahna a tih chaklo theih thu sawiin, an nih tur ang an nih loh phah thei ani tih hriain mitinin ngaipawimawh turin a chah a. National Deworming Day pual hian ni 22-26 February, 2021 inkar hian Kolasib District-a kum 1-19 inkar mi 30500 hnenah rulhut hlo hi a thlawn a semchhuah a ni dawn a. Kolasib CMO hnuaiah vek hian nikum August thla khan rulhuthlo hi mi 29418 hnenah semchhuah a lo ni tawh bawk a ni.

            He meeting-ah hian Kolasib District-a Sawrkar Department hotu hrang hrang, DMS, DEO, PHE, DPO leh DIPRO bakah a tul anga mipui hnena lo thehdarh turin Chanchinbu mite an tel bawk a ni.