2362/2024-2025

Kolasib Dated the 3rd October 2024 : Environment, Forests and Climate Change Department, Kolasib Forest Division-te buatsaihin vawiin khan St. Joseph's Parish Hall, Venglai Kolasibah National Wildlife Week hman a ni.

India ram puma kum tina hman thin - Ramngaw leh Nungchate humhalh inzirtirna hapta 'National Wildlife Week' chu a vawi 70-na atan hman a ni a. Kolasib District-ah chuan 'Wildlife Conservation through Co-Existence' tih thupui hmangin National Wildlife Week hi hman a ni. Pu Vanlalzarzoliana, Range Officer, Central Forest Range, Kolasib chuan he hun hi kaihruaiin Ramngaw leh Nungchate humhalh hna chu mitin mawhphurna a nih thu a sawi a. Nungcha leh Ramngaw humhalh kawnga Sawrkar hmalakna a hlawhtling theihnan mipuite tangrual zel turin a sawm nghal bawk.

He hunah hian Pu Christopher J.Z. Lawlor, Associate Professor, Govt. Kolasib College leh Kolasib District-a Honorary Wildlife Warden ni bawk chuan Kolasiba National Wildlife Week thupui 'Wildlife Conservation through Co-Existence' sawizauna hun a hmanga. 'Ecosystem' leh 'Bio-diversity' chungchangah zirtirna pein, khawvela thil siam zawng zawngte an inmamawh tawn vek dan zirtirna  a pe a. Pu Christopher-a chuan mihringte chu khawvela thil siamte zingah finna, thiamna leh theihna ngah kan nihna angin, khawvel enkawla; ram nuam siam hi mihringte mawhphurna a nih thu sawi a. Pathianin mihringte khawvela a dah chhan pawh A thil siamte enkawl turin a ni tih hriaa, Ramngaw leh Nungcha humhalh hi ringtu nuna bet tlat a nih thu a sawi.

Pu Thanliana Hauhnar, ACF, Kolasib Forest Division pawhin he hunah hian Ramngaw leh Nungchate humhalh pawimawhna sawiin,  mihring leh thil nung dang zawng zawngte chenho theih dan chungchuang a sawia. 'Wildlife Conservation through Co-Existence' thupui hmangin 'Ecological Balance' leh 'Food-Chain leh Food-Web' chungchanga zirtirna  a pe bawk.

Kolasiba National Wildlife Week hmanna ah hian Nungcha leh Ramngaw thlalak chi hrang hrang mipuite hmuh theih tura chhawpchhuah a ni a.

He hunah hian St. John's Higher Secondary School leh C. Zakhuma Higher Secondary School zirlai leh zirtirtu thahnem tak telin, zirlaite hian National Wildlife Week Programme pual hian Extempore Speech hmanga intihsiakna an nei nghal a. Intihsiaknaa ti thate pualin lawmman siam niin Pu Zirsangliana, HA, Kolasib Forest Division chuan lawmman semna hun hi a hmang a ni.