2949/2025-2026

Kolasib, the 16th January, 2026: Vawiin khan I&PR Hall, Project Veng, Kolasib-ah PM Vishwakarma Scheme Awareness Programme buatsaih a ni a. Pu Chinlianmanga, Election Officer, Kolasib chuan Khuallian niin he hun hi a hmanpui.

Khuallian Pu Chinlianmanga chuan thu sawiin, kutthemthiamna hmanga thil siam chhuah kan uar thar hle chu lawmawm a tih thu a sawi a. Sawrkar Laipui chuan kutthemthiamna hmanga thil siamchhuah te chu ramchhung leh ram pawn thlenga pho chhuah a nih theih nan leh eizawnna ngelnghet siam nan he Scheme hi a duang chhuak a ni, a ti. Scheme chu tangkai taka hmang turin kalkhawmte a chah a, eizawnna ngelnghet, mahni mai ni lo chhungkua leh tu leh fate thlenga intundin nan hman theih a nih avangin, tualchhung kutthemthiamte chu PM Vishwakarma Scheme hi dil a, chhawr tangkai turin a sawm a ni.

He hunah hian mithiam hrang hrang ten zirtirna an pe a. Pu Samrat M. Jha, IEDS, A.D. Gr-I, Br. MSME-DFO, Aizawl chuan MSME chungchangah inhrilhriatna hun a hmang a; Pu Thuamzamung Tunglut, Lead District Manager (LDM), Kolasib hnen atangin 'Financial Literacy & Banking Procedures for setting up of Enterprise' tih thupui hmangin zirtirna ngaihthlak a ni.

Mithiam dang - Pu C. Laldampuia, Director, RSETI, Kolasib chuan 'Digital Marketing, Digital Literacy leh E-commerce Onboarding' chungchang a sawifiah a; Pu James Lalrinchhana, Executive Branch Manager, Aizawl chuan IPPB chungchang leh thil tul pawimawh te a sawi a. Pu Lalthakima, YP, Br. MSME-DFO, Aizawl chuan 'PM Vishwakarma Beneficiaries on URC/UAP' chungchangah zirtirna a pe bawk.

Heng bakah hian Pu C. Lalthangkima, GM/DCIO Kolasib; Pu R. Lalthangliana, Domain Expert PMV, Kolasib leh Pi Lalrinchhani, SDC, PM Vishwakarma Nodal Officer, Kolasib ten thusawina hun an hmang bawk a ni.

Vawiina Awareness Programme-ah hian Kolasib District huam chhunga PM Vishwakarma Scheme hnuaia trade hrang hrang atangin beneficiaries 100 chuang an kalkhawm a ni.