981/2024-2025

Dated Kolasib the 27th June, 2024: Vawiin khan DC Conference Hall, Kolasibah District Village Level Disaster Management Committee thutkhawmna neih a ni a. He hun hi Pu Gilbert Lalhlimpuia SDC i/c Disaster in kaihhruaiin, Pu John LT Sanga Deputy Commissioner, Kolasib chuan he hun hi a hmanpui a ni.

He thutkhawmna hun hmanpuitu Pu John LT Sanga, DC chuan, Village Disaster Management Committee-a an sawmna chu lawmawm a ti a. Kal khawmte hnenah lawmthu sawiin a hun hnuhnunglam a nih tawh thu sawiin hetiang hun hi a tawn leh tawh dawn loh thu a sawi a. Kum hnih leh thla thum chhung a awm chhung khan Village Council-te leh NGO hrang hrangte  nena an thawhhona a that thu sawiin, a tan an hlut thu a sawi a. DC chuan, amah mamawhtute leh rawn duh tute tan inthlahrung lovin a puih theina kawngah  eng lai pawhin a inhawn reng thu district mipuite leh kalkhawmte a chah a, khawtlang an enkawlnaah Pathianin a awmpui reng che u a ti bawk.

DC chuan, Village Disaster Management Committee chu a pawimawh hle thu sawiin, sawrkar pawhin tihchak a duh a ti a, chhiatrupna thlen thulha hmanraw mamawh pawh an sem thin a ni, a ti. Khawvel awmdan enin Green Mizoram Day te pawh hmangin, thingte pawh phun belh thin mah ila, kan tui hna te leh engkim mai te dinthar tum thin mah ila, chhiat tawh lam a pan mek a ni a ti a. Mahse, chumi chhe rang lutuk tur chu a chhunga cheng mihringten engemawchen chu kan veng thei  a ni a ti a. Village Disaster Management Committee-te leh NGO hrang hrang ten in tichak tawn a, hma chak zawk a la zel turin a chah.

He thutkhawm ah hian Pu Lalnunfela, D.O,  DM&R Kolasib chuan kalkhawmte hnenah Village Disaster Management Plan chungchangah hmalak dan tur ruangam hrang hrang zirtirna a pe a.  Kolasib District huamchhunga Village Council 44 te hnenah First Aid Box sem a ni a. Tui tla awm thuhlah hman turin heng khaw pasarih- Saipum, Saiphai, Khamrang, Mualkhang, Hortoki, Bairabi North leh Bairabi South V/C te hnenah hian Life Jacket panga theuh leh LifeBuoy pahnih theuh hlan a ni a. Sub Hqrs. YMA Kolasib te hnenah hrui hrual engemawzat hlan a ni bawk.