3079/2022-2023
Kolasib dated 16th December 2022: Vawiin khan DC Conference Hall, Kolasibah ‘Workshop on Good Governance Practices/Initiatives’ neih a ni a. Pu Dawngliana, Former Kolasib DC, 15th September 2006 atanga 4th January 2010 chhung Deputy Commissioner, Kolasib hna lo chelh tawh chu khuallian niin Workshop hawnna hun a hmang a. Pu John LT Sanga, Deputy Commissioner chuan hun kaihruaiin Chief Medical Office, Kawnpui PHE WATSAN Division, DC Office leh DIPRO atangin inrelbawlna tha kalpui nana Kolasib district chhung a hmalakna kalpui dan tarlanna hun hman a ni.

Khuallian Pu Dawngliana, Former Kolasib DC chuan inrelbawlna tha a awm theih nan Sawrkar hnathawkte chuan mipui tan a rawngbawl tur a rawih an nihna an hriatchian a pawimawh hmasak thu a sawi a, mi harsa leh rethei zawk te khawsak dawm kan a nih theih nana Sawrkar kaltlang a hamthatna hrang hrang awmte hrilhhriat leh pek chhuah chu hna pawimawh tak a nih thu a sawi. Sawrkar Department hrang hrang hmalakna zawn a inan loh avangin hmasawnna hna sawt zawk leh awmze nei zawk a kalpui tur chuan Department hrang hrang hotute thawhho leh hmalakna inhriatpuitawn a tul thu sawiin ‘Workshop on Good Governance practices’ chuan hemi kawngah nasa taka a puih ngei a beisei thu a sawi.

Inrelbawlna tha siamna kawngah hmlakna langtlang, mi tin huapzo leh inkaihhruaina tha leh mumal tak a awm a pawimawh thu Pu Dawngliana chuan sawiin chutiang ang inrelbawlna tha leh funkim awm theih nan Kolasib district chhunga Office hrang hranga thawktute chu thawhhona tha nei turin a chah.

Er. Lallawmpuia Sawthly, Sr.SDO, Kawnpui WATSAN Division atangin PHE Department kaltlanga Kolasib district chhung a hmalakna te ngaihthlak niin Jal Jeevan Mission hnuai a khaw 48 ah in 8,657 chu tui connection pek an nih tawh thu leh in awm zat atanga chhut a za zel a 95.78 pek an nih tawh thu a sawi. Dr. RK Lalthlamuana, SMO tarlan danin Kolasib district chhungah kum 12 chin chunglam hnen ah Covid vaccine za zel ah 85.5 an pe tawh a, Malaria lak a mipui an him theih nana hmalakna kal zel ah Annual Parasite Incidence pawh 0.19 chauh a nih tawh avangin thosi hlo kap tur a chet chhuah a ngaih rih tawh loh thu a sawi. Pu Vanlalchhuanawma Chawngthu, SDO (S) chuan mipui leh DC Office indawrtawnna kalphung hrang hrang tarlangin Sawrkar website leh webpages kan neih ang angte chu uluk leh zual a enkawl a tul thu a sawi a, Pu Hmingthanzuala, DIPRO chuan Kolasib district chhunga sawrkar office hrang hrang hmalakna tarlanna hun a hmang bawk a ni.

Vawiin ‘Workshop on Good Governance Practices/Initiatives’ hmanna ah hian Kolasib district chhunga Sawrkar office hrang hrang a hotute an tel a, Pu R.Lalnghakliana, Project Director chuan lawmthu sawina hun a hmang a ni.