2013/2022-2023
Kolasib dated 22nd September 2022: Vawiin chawhma khan DC Conference Hall-ah Mizorama HIV vei pung zel venna tur a Mizoram AIDS Control Society leh Central YMA tangkawp buatsaihin 'Zoram Harh rawh Campaign' kalpui dan tur relin thutkhawmna neih a ni a. Pu John LT Sanga, Deputy Commissioner chuan he hun hi kaihhruaiin Chief Medical Officer, Sub Headquarters YMA, Mizoram Cultural Organisation, District AIDS Prevention & Control Committee, Kohhran hrang hrang thalai pawl hruaitute leh Department thlanchhuah bik atanga aiawhte an tel a ni.

'Zoram Harh rawh Campaign' kaltlang hian mizo thalaite hnenah AIDS chungchanga inzirtirna leh nun uluk leh hrisel nei tur a intuaitharna hun buatsaih tum a ni a. Hemi rual hian Kolasib district chhunga YMA branch a duh apiang tan Mizo Folk song leh hnam lam ah inelna kalpui tur a ni bawk a ni. District tin ah he inelna hi kalpui tur niin Branch pakhatna thlanchhuah te chu Mizoram State level-a inelna ah an tel leh dawn a ni.

Zai inelna ah hian Darmani zai, Lianrikhumi zai, Awithangpa tlawh zai, Labour V Force zai leh Domangi zai atangte hian an duh an thlang thei ang a. Heng hla thluk hmang a hla awm sa emaw AIDS Dona atana hla phuahchawp emaw pawh hman theih a ni ang. Mizo hnam lam pahnih, Cheraw (Kantluang) leh Khuallam hmanga inelna hi neih bawk tur niin YMA branch khat atanga tel tur hi mi 20 aia tlem lo tur a ni.

District Level inelnaa lawmman chu a hnuai a tarlan ang hi a ni a, inelna hi November ni 15-19, 2022 chhung a neih tur a ni.
Pakhatna Rs. 50000
Pahnihna Rs. 30000
Pathumna Rs. 10000 bakah lawmman dangte pawh buatsaih tum a ni.