Vawiin chawhma ah khan Pu Lee Joongyu, Ambassador, Republic of Korea leh a thuihruaite chuan Pu Hiphei, Speaker, Mizoram Legislative Assembly an kawm a. Hemi hnu hian Chief Secretary Pu Lalmalsawma an hmu leh a ni.

Korean Ambassador hi Pu Song Hin Hwa, Political Counsellor, Embassy of Republic of Korea, Pu Joon Yul Yoo, Chief Project Manager, Hyundai Engineering & Construction Co. Ltd., Pu II Joon Kwon, Managing Director, Doosan Power System India Ltd., Pu In Hwan Ok, Chairman, Posco E & C India Pvt.Ltd., Pu Jinyong Shin, Director, Korean Trade – Investment Promotion Agency, Pu III Whoan Chin, Managing Director, Korea Electric Power Corporation leh Pu Youngeun Song, Managing Director, Time Tech Management, Pvt. Ltd. ten an rawn tawiawm a ni.

Speaker Pu Hiphei hian Korean ram thiamna chu Mizoram hian chhawr tangkai theih a duhthu sawiin Mizoram ah hmalakna tur tam tak leh insumdawn tawn nana thil rem chang tam tak a awm thu a lo hrilh a ni. Korean Palai Pu Lee Joongyu hian Mizoram an rawn thleng chu mahni ram a haw ang mai in nuam an tih thu sawiin Mizo mipui hmel hmuh leh boruak nuam tak hip chuan a tih hahdam thu a sawi a. Korean film leh TV serial te Mizo mipuiin an hlut tih hriat chu an tan hlimna nasa tak thlentu a ni tiin nasa zawka cultural exchange pawh kalpui an duh a ni a ti. Korean thalai tam zawkin Mizoram hria se an duh thu a sawi a.Korean culture leh Mizo culture inhriat tawn anih theih nan cultural exchange tam zawk a awm hnu ah Mizoram tana hmasawnna tur kawng dap sak a remchan dawn bakah insumdawn tawnna kawng zau zawk pawh a awm thei ngeia a rin thu a sawi a ni. Korean sumdawng hotulian te hian Speaker hnenah Mizoram mamawh hmasa ber leh an puih theihna lai tur chu kawngpui tha tak siam a nih thu an sawi a ni.

Chief Secretary Pu Lalmalsawma an kawmna ah pawh Mizoram lui tam tak atanga kawlphetha siamchhuahna kawnga thawhho dan tur leh mau sawngbawl dan chungchanga thawhho theih dan tur kawng te an sawi a. Korean Ambassador hian Korea ram pawh 70% lai tlangram a nih ve thu sawiin an ramngaw chereu tawh an siamthat leh hnua Agriculture ah hma an lak chhoh dan te chu Mizoram hian a hlawkpui ve ngeia a rin thu a sawi a ni.

Vawiin ah chuan Chief Secretary leh NIB hotute nen Korean Ambassador leh a team te hian Mizoram sorkar Flagship Programme NLUP chungchangah inkawmna an nei bawk a ni.

Attachment

  • Loading attachment...