Central sorkarin buh leh thlai chi hrang hrang thar tam state te hnenah lawmman The Krishi Karman Award for 2011-2012 chu January ni 15, 2013 khian President Pranab Mukherjee’an New Delhi ah a sem dawn a. Mizoram state bik chu kum 2010-2011 chhunga buh leh thlai a thar tam bik kum anih avangin ‘Commendation Award for 2011-2012’ hlan a ni dawn a ni.
He lawmman dawng tura thlan anih thu hi Union Minister of Agriculture and Food Processing Industries Pu Sharad Pawar’n ziakin Pu H.Liansailova, Agriculture Minister a rawn hriattir a ni.
Lawmman dawng tur hian Agriculture Minister Pu H.Liansailova, Principal Secretary (Agriculture) leh Agriculture Director te chu sawm an ni.
Mizoramin Commendation Award for 2011-2012 dawng tura thlan anih chungchangah Chief Minister Pu Lal Thanhawla leh Agriculture Minister Pu H.Liansailova te chuan lawmman dawn theih nachhan chu loneimi, kuthnathawktute thawhrimna vang a ni tiin, an chungah lawmthu an sawi a. Agriculture leh a kaihhnawih te a than chhoh zelna turin tha thlah lovin theihpatawp kan chhuah zel ang an ti a ni.
