2775/2025-2026

Aizawl, the 25th December, 2025: Mizoram Larsap General (Dr) Vijay Kumar Singh, PVSM, AVSM, YSM (Retd) chu vawiin khan Krismas lawmin Baptist Church of Mizoram Central Church, Aizawlah a inkhawm.

Larsap General (Dr) Vijay Kumar Singh chuan Mizo mipuite Krismas chibai bukin, Krismas chuan inngaihtlawmna nun a entir thu leh khawvelah enna thlenin beiseina a siam thu a sawi a. Thu maia sawi lova, thiltih hmanga hmangaihna lantirna hun a nih thu sawiin, Krismas chuan remna leh muanna a kentel tlat thu a sawi bawk a. Mizo mipuite kumthar lo thleng tur puala duhsakna hlanin, beiseina, hmangaihna leh rinna nena hmalam pan zel turin a sawm nghal bawk.

Kumin Krismas lawmna pual hian December ni 19, 2025 zan khan Lok Bhavan-ah Krismas Carol Service hun hlimawm tak Aizawl West-I Area Masihi Sangati-te nen hman ho a ni a. Larsap-in Mizo mipuite Krismas leh Kumthar chibai bukna leh duhsakna thuchah a tih chhuah bakah, Lok Bhavan chu mipuite tlawh theih turin December ni 24, 25 leh 26 bakah Kumthar January ni 1, 2 leh 3 te hian hawn a ni bawk ang.