Vawiin khan D.C Conference Hall, Mamit-ah Pi Lalbiaksangi District Bawrhsap hovin kan hma maia Kristiante hunpui Krismas 2017 leh Kumthar 2018 Mamit District mipui mimirte'n hlim leh thlamuang taka kan hman theihna tura  dan leh thupek kenkawh dan tur sawiho a ni.

Vawiin meeting-ah  hian Krismas leh Kumthar hlim leh lawm taka kan hman theihna tur hian inbuatsaihna hrang hrangte thlir ho a ni a, SP Mamit leh Excise lam a tangte'n he hunpui lo thleng tur atana  inbuatsaihna ngaihthlak a ni.

SP Mamit chuan Halpuah, Silai a mu nei leh halmawi dang boruak tichhe thei kawl leh zuarte dapchhuah mek a nih thu sawiin Kohhran tinte hnenah he hunpui kaihhnawiha halpuah hal lo tura ngenna  pekchhuah an nih tawh thu a sawi a. Heng bakah hian Kanhmun leh Bairabi kal tlanga dan khap thil lakluhna tur kawngah duty ngawrh leh zuala indah ni se tih a ni bawk.

Excise & Narcotics lam pawhin an duty kal lai pangai bakah ngawrh leh zuala duty in dah tum a ni a, Ni 21 Dec, 2017 tlai atangin Mobile checking nei tura ruahmanna  siam a ni bawk.

Vawiin meeting hian Mamit khawpui hmun lunlaia motor park thinte chu hunpui chhung atan bik hian dahsawn tura ngen ni se tih a ni a, SP Mamit chu hma lo la tura tih a ni bawk.

He hunpui kan hman chhung hian YMA veng paruk te chuan an veng chhung theuvah duty post siam a ni a, heng hmunah hian Police duty tur in dah tel ni se tih a ni bawk.

He hunpui hman chhung hian buaina leh harsatna neite leh  a mamawh tute tan Excise Office, Mamit leh SP Office, Mamit biakpawh theihna hetiang hian tarchhuah a ni. Excise Office, 7630875100/8794791177 ah te englai pawha  biak pawh theih an ni ang. SP Office, Mamit be pawp duhte tan 2565222/2565100/7630875007 ah te biak theih an ni bawk ang.

Meeting- ah hian Pu H. Lianzela, Addl D.C, Pu Narayan Thapa SP, Mamit, Pu H. Lalchhuanawma, Superintedent of Excise, Pu Zatluanga Sailo, President Sub Hqrs YMA leh Pi Lalzikpuii SDC Mamit te an tel a ni.