No.6818/2020-2021

Lunglei the, 9th, Dec’2020: Vawiin chawhma khan Association for Voluntary Blood Donation (AVBD), Lunglei leh Blood Bank, Civil Hospital,Lunglei tangkawp buatsaihin Krismas Puala Thisen Pek Runpui 9th-31st December, 2020 hun chhunga neih tur chu Blood Bank, Civil Hospital, Lunglei ah Dr. S.R. Ngurchamliana, Medical Superintendent, Civil Hospital leh President AVBD, Lunglei ni bawk chuan a hawng a ni.

Dr. S.R. Ngurchamliana chuan hawnna thu sawiin Krismas Puala Thisen Pek Runpui hi Lungleiah chauh nilovin Mizoram hmun hrang hrangah hman mek a ni a ti a. Blood Bank, Civil Hospital, Lunglei chu tehna hrang hrang ah Mizoram pumpui ah pahnihna dinhmun an hauh mek thu sawiin a thlawna thisen petute zawng zawng chungah lawmthu a sawi a. Damlo leh a mamawhtu ten thisen an dawn theih nana Thisen Pek Runpui program buatsaihtu AVBD leh Blood Bank thawktute fakawm a tih thu sawiin petute leh pek tuma inbuatsaihte chungah lawmthu a sawi bawk. Lunglei Civil Hospital Blood Bank chu kum 1993 atanga tanin khaihlak loin a la kal zel a. Tun ah thawktu Doctor 1, Technician 4 leh IV Grade 3 an awm a ni a ti bawk.

Nunna chhanhimtu leh midangte malsawmna ni turin, hemi hun chhung hian a thei apiangten thisen pe theuh turin AVBD, Lunglei chuan a sawm a ni.  Krismas Puala Thisen Pek Runpui  hi 9th-31st December, 2020 hun chhunga hman tur niin thisen pe duh apiang chuan Blood Bank, Civil Hospital, Lunglei-ah Thawhtanni atanga Zirtawpni zing Dar 10 atanga tlai dar 4 chhungin pek theih a ni e.