Pu Lal Thanzara, Minister I&PR chuan vawiin khan Mizoram Public Service Commission (MPSC) Silver Jubilee lawmna Mini Examination Hall, MPSC building a neih chu a hmanpui. Pu P.C. Lawmkunga IAS (Rtd.) MPSC Chairman chuan inlawmna thusawina hun a hmang a ni.

Minister chuan India ramin khawvela Constitution tha leh changtlung ber zinga an sawi tel fo thin kan nei hi kan vannei hle a. Constitution zir mi te phei chuan a siamtu te (framers) lo ropuizia, an hmathlir alo thui zia min hriat chhuah tir thin a ni. Vawiinah chuan, State Civil Services hrang hrang exam te a buatsaihin mi engnge maw zat lak an lo ni tawhin, tunah phei chuan Combined Civil Services Exam te alo nei leh ta zel a, zawi zawiin hma kan sawn zel a ni tih han hmuh hi a lawmawm tak zet a ni tiin, infrastructure ah pawh - a tira mimal In luah a bul tan kha vawiinah chuan mahni building ngei atangin alo function ve ta te hi a lawmawm hle a ni a ti. Heng zawng zawngah hian he Commission bul lo tantu Chairman leh Member te, an hnu zela chung dinhmun pawimawh rawn luahtute leh vawiin thlenga thawktu Chairman leh Member ni mek te leh thawktu teber atanga lu ber te inpekna leh thawhrimna rah a ni a ti a.

Pu Lal Thanzara chuan MPSC in Kum 25 chhunga felfai tak, sawiselna awm miah lova alo kal thei hi a ropui a tih thu sawiin. Hei hian a bul tan dan a fuhin, a hnu zela he Commission a mawhphurhna pawimawh tak rawn chelh zuitu te inpekna leh dikna an kenkawh zel zia a ti lang chiang hlea a hriat thu a sawi. A tir atangin vawiin thlengin Chairman leh Member fel leh tling tak takin an lo hruai tawh thin a, he tradition hi vawng nung zel tur leh he Constitutional Institution pawimawh tak mai hian a dinchhan ang ngei a, dik leh felfai taka hna a thawh chhoh zel theih nan a duhsakna a hlan a ni.

Vawiin Silver Jubilee lawmna ah hian MPSC Chairman leh Member hluite bakah officers leh staff lo thawk thin thahnem tak an kal a, he office a thawk tawh thin boral ta mi 15 te sunna hun an hmang bawk.

MPSC hi 1 May, 1991 khan tan a ni a. Tuna an office building hi 1 April, 2008 khan an luah tan a. Tunah hian district tinah exam centre an nei tawh a ni.