Vawiin khan Dr. R.K Lallianthanga, Chief Scientific Officer, Directorate of Science and Technology (DST), Govt. of Mizoram hovin a office ah he department hnuai peng hrang hranga Scientist te leh Officers ten kum 30 kalta, 1986 atanga kumin 2016 January thla bik chhunga Aizawl khawpui khaw lum leh vawh dan zirchianna leh sawihona an nei. Kumin 2016 January thlaa a vawh lai berin Celsius Degree 3.7 a ni a, average minimum temperature chu Celsius Degree 6.37 a ni.
Dr. R.K. Lallianthanga chuan Science & Technology-in Mizoram tan kawng hrang hranga hma a lak chhoh dan sawiin, State Meteorological Centre-in khaw awm dan data lakna kawnga hma a sawn dan te, State Climate Change-in sik leh sa lo danglam chhoh dan zirna kawnga hma an lak chhoh dan tlangpui a sawi a.
State Climate Change Cell a Project Scientist pahnih Pu Lalthanpuia leh Pu James Lalnunzira Hrahsel ten power point presentation hmangin khaw chin an zir chianna report an pe a. Hemi zawhah hian sawihona neih chhunzawm nghal a ni. Data an lakkhawm atanga an zirnaah chuan 1986 atanga kumin 2016 thleng, January thla bikah hian chawhrualin zawi zawi in khua a lum chho hret hret tih a hriat theih a. Chutih rualin kum tin, January thla a lum ber lai leh a vawh ber lai inkar (Range) chawhrual erawh a zau tial tial a. Kumin January 2016 ni 24 kha kum 30 chhunga a vawh ber tum niin, temperature hniam lai berin Celsius Degree 3.7 a ni.
Data atanga alan dan chuan, kum 30 chhungin, January thla nitin a lum ber lai chawhrual a pun chhoh dan chu kum tin Celsius Degree 0.087 a ni a, a vawh ber lai tlak hniam zel dan chu Celsius Degree 0.034 ang zel a ni. January thla nitin khaw lum dan chawhrual chu Celsius Degree 0.026 vela pung chho ang zel a ni.
Science and Technology hnuaia State Climate Change Cell hi National Mission for Sustaining Himalayan Ecosystem (NMSHE) project atangin Kum 2015 a din a ni a. He cell hian a bikin Mizoram a sik leh sa inthlak danglam dan leh chumi in a kawng hrang hranga nghawng a neih mek leh neih zel dan tur zirchianna a kalpui mek a ni.
