Finance Minister Pu H. Liansailova chuan tunhnai kum hnih khat kalta chhung maiah pawh khan Mizo thalai ten infiamna chi hrang hrangah hmasawnna namenlo neiin, infiamna hmunhma leh hmanruaah pawh Mizoram sorkar chuan thil chhinchhiah tlak tam tak a puitlin a ni, a ti.
He thu hi vawiina D3 LG Inter Village Volleyball Tournament, Ramhlun Sporting Club Field, Ramhlun North-a a hawnna a a sawi a ni a. Minister chuan ram changkanna leh infiamna a hmasawnna hi a kal kawp tlat tiin ramin hma a sawn poh leh infiamna pawhin changkan lam a pan ve zel a ni, a ti. Mizoram sorkarin infiamna lama thalaite hmathlir thui tak a nei a, a tihlawhtling turin theihtawp a chhuah chhunzawm zel dawn a ni tiin Minister chuan Zofate zingah ram chhung mai ni lo ram pawna chawimawina dawng phak tam tak an awm ta hian khawvel hmasawnna kal zelah Mizoram pawh a thlen san ve tak zia a tilang a ni, a ti bawk.
April ni 17 thlenga khelh tura ruahman he tournament hi Mizoram-a Volleyball tournament awm tawh zawng zawnga lawmman sumfai tamna ber niin Team 27 an inel dawn a. Lawmman pakhatna cheng 50,000, pahnihna cheng 20,000, pathumna cheng 5000 niin Team tel zawng zawng te hnenah Participation Price cheng 1000 pek an ni bawk ang.
Hawnna inkhawm hi Organising Committee Chairman Dr. Robert Rualthankhuma’n a kaihruai a. Ramhlun North Local Council Chairman Pu Lalremchhunga’n kalkhawm te lawmna thuchah sawiin Organising Committee Secretary Pu Laldingliana Sailo chuan report a pe a ni.
Team tel thei tur a in ziaklut te chu Ramhlun North,=huampui, Zuangtui, Hunthar, Laipuitlang, Armed Veng South, Muanna Veng, Sihphir Venghlun, Vaitin, Puilo, Maubawk, Kanan, Chanmari West, I.T.I, Kawnpui, Sairang Dinthar, Bungkawn, Nursery, College Veng, Phunchawng, Chawlhhmun, Dinthar, Vaivakawn, Sihphir, Salem veng te an ni.
Ni.05.04.12(ninga) zan khan tie draw neih a ni a. Team hrang hrangte hi Pool li-ah then niin match khatah hian game nga zel khelh tur a ni. Khelh hmasak ber atanga final thleng hian knockout system-a khelh tur a ni a. Inkhelh tam zawk hi zan lama khelh tur a ruahman a ni.
