State Working Committee, National Foundation for Teachers Welfare chu vawiin chawhnu dar 2:00 khan School Education Directorate Conference Hall ah Chairman Pu H.Rohluna, School Education Minister hovin an thukhawm a, National Foundation for Teachers Welfare atana sum tuak dan ngaihtuah turin Sub-Committee an siam a, kumin Teachers’ Day hman dan tur leh District tina mawhphurtu tur Committee te an ruat bawk. July, 2014 atanga June 2015 (thla 12) chhung khan zirtirtu natna khirh tawktu mi 78 hnenah tanpuina Rs 4,66,000 /- hlan an ni. Zirtirtute Ni pual hian Chief Minister leh Education Minister te thuchah cable TV leh chanchinbu lamah chhuah ni se tih te an rel bawk.
Minister Pu H.Rohluna chuan Teachers Day chu kum tina hman thin niin zirtirtute pawimawhna inzirtir nan leh chawimawi nan hman thin a nih dan te a sawi lang a, zirtirtu te chu ram leh hnam tana zirlaite chhertu an nih thu sawiin Teachers’ Day hlawhtling taka hman a nih theih nan mawhphurtu ten theihtawp chhuah theuh turin a chah bawk.
State Working Committee ah hian Parliamentary Secretary Pu Joseph Lalhimpuia, School Education Secretary Pi Manisha Saxena, IAS leh School Education, Sports & Youth Services, I&PR, Printing & Stationeries, A.I.R., Doordarshan Department hotute, District Administration hotu te bakah zirtirtu pawl hrang hrang hotute an tel a ni.
