NLUP kalpui tan tirh atangin a kum 7-na kan lo lut ta. Kum 6 kal ta chhung khan harsatna chi hrang hrang karah hmasawnna leh hlawhtlinna tam tak kan nei a. Kuthnathawktute tan bika Sorkarin sum ruahmanna NLUP hmanga alo siam hian a bik takin eizawnna kawnga harsatna sut kian tuma thahnemngai mitam takin an hlawhtlinpui zia kan hria a. Kan ram leh kuthnathawktute tana malsawmna kawngka hawngtuah NLUP atang hi lawm awm kan ti tak zet a ni. 

Hetih lai hian duhthusam tling tawk lo,'siam that ngai tam ta lai hian, Mizoram Economic Development atana direct leh indirect-a NLUP contribution hi a chhuanawm tak zet a ni. 

Kan hruaitu MLA te, Party-a mithahnemngaite, Sorkar hnathawkte, NGO, Kohhran leh Khawtlang leh ram hmasawnna atana thahnemngaite min tawiawmna avangin hetiang hlawhtlinna hi kan chang thei a ni tih ka hria, in chungah lawmthu ka sawi e. Harsatna um kian tuma thahnemngai taka beneficiary te hmalakna min tuipui avang leh neitu chan in chan avangin a lawmawm leh zual. Khawpakhata NLUP marketshed ah an khawtlang hotu ten "NLUP dodaltu chu ram hmelma a ni" tih an tar a. Hetiang hmasawnna kawnga thahnemngai khawtlang hruaitute chungah pawh lawmthu ka sawi. 

Tunah hian NLUP 3^rd leh 4^th Phase-a beneficairy chhunzawm _ ngai te tanpuina hna hi kalpui mek a ni a. Kum 2017-18 ah hian avaiin zo fel hman ngei tura ruahmanna siam a ni. 

NLUP hmanga hmasawnna khairual, inclusive development atana hmalakna hi ram hmasawnna ngialnghet hring thei ngei turin hma thar engemaw zat lak mek a ni a. Kan ram mipuite leh hruaitute duh danin NLUP hi chhunzawm a ni zel ang. 

Kan thil tharte man man zawk leh kuthnathawktuten hlawkna tam zawk an dawn theih dan turte, kan thawhchhuah ngei hmanga ram hmasawnna tha zawk nei thei turin hma lak mek a ni bawk. 

NLUP Phase-ll ah hian NLUP chhawpkhatna ang bawkin Central Scheme hrang hrangte atanga kan sum dawn te tangkai zawka hmang turin 'Convergence Model' chhunzawm a ni ang. 

NLUP Phase-ll atana project siam mek te hi kan mamawh hrang hrang atana scheme leh sum awmsa hman mai tur awm loh avanga harsatna phuhru turin "gap funding" atan te, kan ram economic development mutan "major obstacle" sutkianna atan leh ei leh bar zawnna (livelihood) baka NLUP thil tum bulpui - ram leilung hausakna "Natural Resource" tangkai zawka hman te, ramngaw siam that te, land reforms te urhsun zawka kalpui a ni ang.

Kumin Kuthnathawktute ni 19^th January 2017-ah hian Aizawl khawpui bakah District Hqrs leh Block Hqrs hrang hrangte tiamin hmun 40-ah Kuthnathawktute Ni hi uar zawka hmang turin ruahmanna siam a ni a. Kan Minister leh MLA hote, District Council-a hruaitu thenkhat leh officical mipawimawh engngemawzat he programme hmang tur hian ruat an ni a. Retheihna umbo nana ei zawnna tha zawk buatsaihna hian mimal, chhungkua leh ram tana hmasawnna thar a hring ngei ang tih ka ring. Inthuruala ke kan pen za chuan harsatna engmah- min dal thei a awm lovang. 

NLUP hian hnathawhna peng hrang hrangah thahnemngaihna leh hmasawnna thar a hring tawh a, a rah seng mai theih loh serthlum, kuhva, rubber leh thlai thenkhatte erawhchu kum 6/7 hnuah chauh a rah seng tur a awm dawn a. NLUP sawichhiat phur riau mi thenkhat ten heng thlaite hian rah a chhuah nghal loh avanga NLUP tangkai lo leh hlawhchham anga an sawi thin te hian kuthnathawktute a tih hnual theih bakah hmasawnna kawng daltute a ni tih mipui ten i hre tlang ang u. 

Hetiang anga hmasawnna khairual "Inclusive Development" hring tur ruahmanna kan siam hi Development Model zinga tha ber te zinga ngaih ,a ni. Tin, beneficiary te sum bo thlau awm lova, an chan ai dik tak an chan ngei theihna atana "bank Account" beneficiary tin ten neih ngei tura kan hotuten an lo rel hi tuna kan Prime Minister Pu Modi-a policy thar atan hian a bik takin a tangkai zual a; cheng 500 leh Cheng 1000 note tih thih avang leh bank-a pawisa lak chhuahna khuahkhirhna thar siam a nih hnu phei chuan a tangkai leh zual. Kawng tam takah NLUP hi India ram tana kalphung thar ruahmanna-a hmahruaitu a lo ni. 

NLUP hlawhtlin nan leh phuisui zawka kalpui a nih theih nan Sorkar in policy thar NEDP a buatsaih a. He policy thar hi a hria apiang, a bik takin Mizoram pawna mithiamten tha min tih pui tak zet a. Keimahni finna a beitham tih kan hria, mahse mirethei leh Mizoram hmangaihtu kan Pathian hian hetiang ang policy tha leh duhawm siam chhuak tura malsawmna min la vur hi a lawmawm kan ti tak zet a, hlawhtling zawka hmasawnna tluantling nei turin in thurual leh thahnemngaihna thuhmunin i pen ho zel ang u tiin Zoram mipuite leh Kuthnathawktute zawng zawng ka ngen a ni.