Nimin chhun dar 1 khan Kendriya Vidyalaya School (KVS) chuan I & PR Auditorium Hall-ah 1st Annual Day 2012 an hman chu Champhai District Deputy Commissioner Pu Vijay Kumar Bidhuri chuan a hmanpui.

Khuallian Pu Vijay Kumar Bidhuri, Champhai D.C & Chairman VMC KV chuan thu sawiin he school hi din chhoh anih theih nan kum 2010 atanga hmalak chhoh dan sawiin Champhai-ah hetiang school tha din chhoh anih theih nana Champhai mi thahnemngaite chungah lawmthu sawiin School building tha zawk sakna tur atana hmun ngaihtuah puitu Land Revenue & Settlement Minister Pu J.H. Rothuama chungah lawmthu a sawi bawk a. First Annual function ah pawh zirtirtu leh zirlai ten programme tha taka an hmang chu tha a tih thu sawi telin kum lehlam ah phei chuan a that lehzual a beisei thu a sawi bawk.

Champhai District DEO Pu K. Lalrintluanga, khual zahawm pawhin thu sawiin hetiang KV School ang hi Champhai tan a awhna a rei tawhin inenkawlna leh inkaihhruaina a that thu sawiin he School hmasawnna atana hmalak puitu Champhai D.C. chungah lawmthu a sawi bawk a ni. DEO chuan Mizoram-ah KVS hi pali chauh a la awm thu sawiin Aizawl-ah 2, Lunglei-1 leh Champhai ah 1 niin Champhai KVS a than chhoh dan leh la naupang te si, hma an sawnna ah thawktu Principal leh zirtirtu ten fak an phu a ni a ti.

KVS School Principal Pu S.Umananda Sharma chuan School inrelbawl chhoh dan report pe in tunah hian zirlai 135 leh thawktu 13 awmin class III atanga computer subject an neih thu leh Music, English, Hindi, Sanskrit etc. te zirtir an nih thu a sawi bawk.

He function ah hian zirlai te, nu leh pate bakah mi sawm te an kal tha hle a. Champhai HDFC Branch Manager Pu B. Pathak leh Pu Ojha Lead Bank Manager te chuan zirlai zawng zawng te geometry box an lei sak vek dawn bawk a ni.