Krishi Vigyan Kendra (KVK) Champhai District, Khawzawl chuan Champhai District huamchhunga khaw 5 – Khawzawl, Tuipui, Tualte, Neihdawn leh Champhai Zotlang a loneitu thlan chhuah mi 30 te tan Purunvar chin leh enkawl dan inzirtirna Training an buatsaih a, loneitute hnenah hian Purunvar hlawhtling taka an chin theihna turin an mamawh hrang hrang te a thlawnin an sem nghal a ni.

KVK Champhai District, Khawzawl hian Purunvar chin leh enkawl dan inhrilhhriatna hi KVK Farmers Training Hall, Khawzawlah an buatsaih a. Training hi KVK Head & Senior Scientist Dr. Vanlalhruaia Hnamte in a kaihruai a. Thu sawiin tuna an hmalakna hi NABARD atanga an sum hmangin an kalpui tih sawiin Purunvar ching tura thlan chhuah loneitute chuan a thlawnin Purunvar chi leh mamawh dangte an dawng a, an vanneihzia inhriain hlawhtling ngei tura taima tak leh rim taka thawk turin loneitute chu a fuih . Loneituten harsatna an neihte sutkianpui turin KVK chu an awm reng tih sawiin loneitute chu an harsatna tawhte inthlahrung lova an hnena thlen turin a fuih a, an theihnaah chuan KVK Scientist ten an thiamna te loneitute tana hmang turin an inpeih reng tih a sawi a ni.

He hunah hian KVK Scientist Pi Malsawmkimi’n loneitu kalkhawmte hi hlawhtling taka Purunvar an chin leh enkawlna tura hriat tur pawimawh chi hrang hrangte a zirtir a, loneituten Purunvar an chinna a an harsatna tawh an sawi te pawh a tih dan tur an inhrilhhre nghal a ni. Training neih zawh hian loneitute hnenah hian a thlawnin HDPE Pipe Roll 30 bakah Sprinkler leh KVK, Champhai District in an siam chhuah Vermi-compose te an mamawh tawk ang zelin pek an ni.

KVK Champhai District hian Champhai District chhunga hmun hrang hrangah Purunvar Variety chi hrang hrang an lo enchhin tawh a, Variety hrang hrang an enchhin zingah hian Purunvar Variety G-282 chuan Champhai District sik leh sa hi a ngeih ber tih an hmuchhuak a. Tun tuma NABARD atanga sum hmuh hmanga Purunvar an chintir pawh hi Variety G-282 a ni a. Loneitu tin hian Purunvar hi Acre 1 a zauvah an ching a ni.