301/2022-2023
Khawzawl 27th April, 2022: KVK Khawzawl leh ATMA Khawzawl tangkawp chuan nimin khan KVK Farmers Hostel-ah Azadi Ka Amrit Mahotsav hnuaia Kishan Bhagidari, Pramikta, Hamari Campaign bultumin ‘Kishan Mela/Farmer’s Fair’ an buatsaih.

Nimin chawhma dar 10:30 khan Kisan Mela hawnna pual hian KVK Training Hall-ah inkhawm tawi buatsaih a ni a, he hun hi KVK Head & Senior Scientist Dr. Henry Saplalrinliana chuan a kaihruai a. He hunah hian DAO Khawzawl Pu B. Ramnunsanga leh DHO Khawzawl Pu Lalengzuala ten thu an sawi bakah Farmers Scientist Interaction Programme an hmang zui nghal a. Hemi zawh hian KVK Farmers Hostel-ah Kisan Mela hi neih chhunzawm nghal a ni.

Kisan Mela-ah hian KVK, Agriculture Department leh Horticulture Department ten thlai chi, hlo chi hrang hrang leh hmanraw dangte man tlawm zawka an zawrh chhuah bakah kuthnathawktuten an thlai thar chhuah leh an thil siam chi hrang hrangte an zuar a, A.H & Vety Department-in Animal Health Clinic an buatsaih bawk. Heng bakah hian Potted Flower, Bonsai leh House Plant inentirsiakna neih a ni a, a ti thate hnenah lawmman sem chhuah a ni.