No.5194/2020-2021  

Dated Khawzawl, the 17th September, 2020: Vawiin khan KVK  Khawzawl buatsaihin Anganwadi Wokers leh Loneitu thenkhatte tan ei tur tha ei inzirtirna thla (Poshan Maah) pualin KVK Training Hall-ah hun hman a ni. He hun hi Khawzawl District Bawrhsap Pu Zothanmawia chuan khuallian niin a hmanpui a ni.

He hun Dr. Henry Saplalrinliana, KVK Senior Scientist kaihruaiah hian khuallian Pu Zothanmawia chuan thu sawiin, Anganwadi naupang te'n ei tur tha an dawn thinte tunlai hrileng  karah pawh sem chhunzawm reng a ni chu lawmawm a tih thu a sawi a. Anganwadi Centre bul hnaiah hriselna atana tha thlai ching uar turin a chah a, chuktuah huan siam uar thar leh theih nise a duh thute pawh a sawi lang bawk a ni. Kuthnathawktu kaihhnawih department hrang hrang KVK, Agriculture leh Horticulture Department-te chu a thlawna thlai chi dawnna atan mai ni lo, a taka hmang tangkai turin a chah bawk a ni. Thlasik thlai chin a hun chho mek a, thlasik thlai chin hi Mizo zia nena inmil tak mai niin, hnimin an dip lova, tui an mamawh tam em em lo bawk a ni, tiin thlasik thlai chin lam uar tha a tih thu a tarlang bawk a ni. Bawrhsap  Pu Zothanmawia chuan kalkhawmte chu  thil tih reng rengah tum mumal tak nei turin a chah a, an beisei ang a thleng chiah lo a nih pawhin hmasawnna engemaw zat tal an hmu thei dawn a ni, a ti bawk. 

He hunah hian KVK mithiamte chuan mihring tana ei tur tha thlai chin dan chungchangte, thlai chi hrang hrangah mihring tan ei tur tha a awm dante, eitur sawngbawl dante zirtirna an pe a, he huna kal khawm Anganwadi wokers leh Loneitute hnenah hian thlai chi sem chhuah nghal a ni bawk.