3729/2022-2023

Khawzawl 1st March, 2023 : Vawiin chawhma dar 11 khan Krishi Vigyan Kendra (KVK) Khawzawl chuan Khawzawl District chhung khaw 5 - Arro, Chhawrtui, Hmuncheng, Neihdawn leh Khawzawl khuaa loneitu thlan chhuah mi 32 te tan thlai chin leh enkawl dan chungchang inzirtirna leh a thlawna thlai chi sem chhuahna, KVK Farmers Training Hall-ah an buatsaih. He hun hi Khawzawl Divisional Horiculture Officer (DHO) Pu Lalnunpuia chuan khuallian niin a hmanpui a ni.

DHO Khawzawl Pu Lalnunpuia chuan thu sawiin, KVK Khawzawlin training leh thlai chi hlu tak takte loneitute hnena semna hun an buatsaih chu lawmawm a tih thu sawiin, loneitute chu hlawkpui ngei turin a duhsak tih a sawi a. Ram leh khawtlang hmasawnna turin Horticulture Department, KVK leh loneitute chu lungthu anga tangho tlat tur an nih thu leh, loneitute chu mamawh leh harsatna an neih apiangah inthlahrung lova KVK Scientist-te leh Horticulture Department-a thawkte chhawr tangkaia rawn thin turin a chah a. Khawzawl khawpui leh chhehvel khuate thlai thar chhuah kawngah tanlak zual a tul thu sawiin, lang thama hmasawnna nei turin loneitute leh KVK Scientist-te chu thawhpuiah a sawm nghal a, loneitute harsatna tawhte sukiang turin Horticulture Department chu a inhawng reng tih a sawi bawk.

Vawiin training leh thlai chi sem chhuah programme hi Pi R. Vanlalduati, SMS (Soil Science) in a kaihruai a. DHO Khawzawlin thu a sawi zawh hian Pi R. Vanlalduati'n Powerpoint Presentation hmangin thlai chi sem chhuah turte chin leh enkawl dan zirtirna a pe a, zirtirna a pek zawh hian loneitute leh KVK Scientist ten inkawmhona, Scientist Interaction an nei nghal bawk.

Training neih zawh hian loneitu thlan chhuah mi 32 te hnenah hian thlai chi - Zikhlum, Bawkbawn, Hmarcha, Bean, Bawrhsaiabe leh Carrot-te semchhuah a ni a. Heng thlai chi te hi Indian Agriculture Research Institute & Indian Institute of Agriculture Research, Northeast Horticulture Scheme hnuai atanga sem a ni.