2951/2025-2026

Kolasib, 15th January, 2026: Vawiin khan Krishi Vigyan Kendra (KVK), Kolasib-ah Mizoram chhunga RD Block hrang hrang pali atanga lo kal Farmers Producer Company (FPC) pali te tan ‘Training cum Exposure Visit’ hlawhtling taka neih a ni.

He hun hi Dr. Michelle C. Lallawmkimi, Senior Scientist & Head, KVK Kolasib chuan a kaihruai a. Kalkhawmte hnenah thu sawiin, FPC hrang hrang ten an pawimawhna an hriat chian a tul thu leh, farmers te tana tangkai tur thil ngaihtuahna tha neih chu an kovah a innghat a ni, a ti a. Tunlai thiamna sang zawk, farming technology thar hmanga farmers te zirtir zel an ngaih tawh thu a sawi bawk.

Vawiina Training cum Exposure Visit-ah hian FPC pali - Tlaizawng FPC, Serlui FPC, Langkaihruam FPC leh Zotui FPC te an tel a. Heng FPC hrang hrang te hnuaiah hian loneia eizawng mi 559 an awm mek a, vawiina training petute hian anmahni hnuaia farmers te hnenah training hi an pe chhawng leh dawn a ni.

Training-ah hian subject hrang hrang pathum - Agronomy, Horticulture leh Home Science-ah te zirtirna pek an ni a. Training neih zawh hian KVK Kolasib Demonstration Farm tlawh nghal a ni bawk. Kolasib District chhunga KVK Kolasib ten hlawhtling taka Nihawi (Sunflower) an sawngbawl dan leh, a tel an her chhuah nghal dan te thlir ho a ni.