Krishi Vigyan Kendra (KVK), Mamit District, Lengpui chuan vawiin khan West Lungdar leh Chungtlang khuaahte loneitute hnenah rannung leh natna laka buh leh thlai ven leh enkawl dan hrilhhriatna an buatsaih.

KVK Lengpui hian National Centre for Integrated Pest Management kaltlangin West Lungdar leh Chungtlang khuaah te kalin loneitute hnenah training an pe a. Vawiin chawhma khan West Lungdar-ah Dr. Rebecca Lalmuanpuii, Scientist, KVK Lengpui chuan training hi a kaihruai a, Sawrkar laipuiin loneituten hlawk zawk a buh leh thlai an tharchhuah theihna tura ruahmanna chi hrang hrang loneitute tana a buatsaih zinga pakhat - National Centre for Integrated Pest Management hnuaia West Lungdar a loneitute tana rannung leh natna laka buh, thlai leh thei ven dan Training buatsaih a ni chu thil lawmawm tak a ni tiin Training hi hlawkpui tum ngei turin loneitute chu a chah. Resource Person Pi Lyncy Lalrindiki, Directorate of Agriculture R&E, Mizoram chuan loneitu kalkhawmte hnenah hian buh leh thlai, a bik takin Aieng leh Serthlum, rannung leh natna laka ven dan leh enkawl dan hrilhhriatna a nei zui nghal a. A thu a inhrilhhriatna neih zawhah hian Aieng leh Serthlum huanah a takin damdawi leh hlo hman dan te an inzirtir leh a, zawhna leh chhanna hunte an hmang ho nghal a. Training a tel Farmers 55 te hnenah hian KVK Lengpui hian a thlawnin IPM Kit a hlan theuh a ni. Pu Rualthantluanga Pachuau Scientist pawhin training leh huanah entirna pein lo neitute hnenah an harsatna sutkian danna zirtir bawk.

West Lungdar a Training an neih zawh hian Chungtlang ah tlai lamah Chungtlang khuaa Farmer-te tan an khaw BNRGSK Building/VC Hall-ah Farmers 30 rual tan Training hi pek leh a ni a. A thu a inhrilhhriatna an neih zawhah Serthlum hunah damdawi leh hlo hman dan a taka entir leh a ni a, zawhna leh chhanna hun te an hmang ho bawk a. Farmers te hnenah hian KVK hian IPM Kit pawh a thlawnin a hlan ve leh a ni.