Vawiin tlai khan Labour Employment Minister Pu H.Rohluna chuan Assembly Annex Building-ah Mizoram Youth Commission(MYC) buatsaih Youth Summit leh Roadshow, Aizawl khawpuia neih chu a khar a. MYC chuan Youth Summit leh Road Show chu April leh May thla chhungin Mizoram a District khawpui zawng zawngah te a buatsaih chhunzawm dawn a ni.
Youth Summit Kickoff kharna hunah hian Labour Employment Minister Pu H.Rohluna chuan MYC, UD&PA, LEDSE, MzSRLM leh thalai khaihhnawih hmalakna chang deuh bik Department dang te kaltlangin thlalaite khawvel thar zauh sak kawngah sawrkar in chak takin hma a la chho mek a ti a. Mizoram Skill Development Policy pawh peihfel thuai a nih tur thu sawiin policy thatak nen sawrkarin Mizoram thalaite thiamna leh theihna peipung turin tan a la chho zel dawn a. He Skill Development Policy hmang tangkai thei tur hian thalaite an inbuatsaih lawk a pawimawh hle dawn a ni a ti.
Pu H.Rohluna chuan Mizoram thalaiten mihlawhtlingte an hmuhin an tunhun chiah en loa an hlawhtlinna kawnga an thawhhrimna leh harsatna tam tak an paltlangte pawh an hmuh tel a ngai tih a sawi a. Hlawhtlinna kawngah harsatna pumpelh zawngin kawng awlsam a awm lo tih kan chian tlan a ngai a ni a ti. Social Media a veiawm thu sawiin thalai tam zawkin hun khawhral nan an hmang chu a thil pawi tak a ni a ti a. Hriatna tipung tur leh thiamna belhchhahna atana internet hmang tangkai si lovin mi tam zawk chuan social media-ah an hun hlu tak an khawhral thin nia sawiin midangte umpha tur leh tan la tur chuan kan thalai ten social media chungchangah an inenfiah a hun hle tawh ni in a sawi.
MYC Youth Summit Kickoff kharna hun hi Labour Employment, Skill Development & Entrepreneurship(LEDSE) Director Pu Lalhmunsanga Hnamte in a kaihruaia, Report tawi MYC Secretary Pi H. Malsawmi in a pe a, Roadsow chhunga visual art category 3 intihsiakna a lawmman siamte sem a ni. Report a tarlan dan chuan Aizawl a MYC Youth Summit leh Roadshow hian tlawhtu mi 6000 chuang zet a nei a; heng a tlawhtute zingah hian zirlai MZU, College, School leh zirna in chi hrang hrang 45 atanga lo kal te an tel a ni. Photography Competition-ah R.Lalrinmawia, Ramhlun North, Short Documentary Film Making Competition-ah Roma Film Production leh Painting Competition-ah Aldrin Lalchhanchuaha, Mamit ten lawmman pakhatna theuh an dawng a ni.
