Vawiin khan LAD Minister Pu K.Lalrinliana chuan a office chamber-a programme tawi buatsaihah India Danpui 6^th Schedule in a huam loh Village Council-te hman tur sum cheng vaibelchhe 45.44 a sem chhuak a. District paruk – Aizawl,Lunglei, Champhai, Serchhip, Kolasib leh Mamit District Local Administration Officer ten sum hi an District huamchhung VC te aiawhin an dawng a ni.

Pu K.Lalrinliana chuan Mizorama thingtlang khuate hmasawnna hna thawhna tur sawrkar laipui atanga sum lo kal hi a thlenna tur dik takah a thlen a, hmasawnna ruhrel tha leh rintlak, mipuiin tangkai taka an chhawr theih tur din a nih ngei theih nan fimkhur turin DLAO te a chah a. Mipui pungkhawm Gram Sabha rawn chunga anmahni khaw bil theuh hmasawnna hna thawh tur ruahmanna an siam, sawrkara an thehluh ang mila sum dawng an nih avangin a tak taka hna an thawh ngei a, khawtlang tana chhawr nahawm tur thil tangkai siam ngei se a duh thu sawiin a vil zui hna pawh uluk taka thawk turin LAD Minister chuan DLAO te a chah a ni.

14^th Finance Commission chuan Panchayati Raj nei velo, Non-Part IX Area – Mizoram, Meghalaya leh Nagaland-ah te rural local bodies (Village Council) te tan sum a dah lova. Amaherawhchu sawrkar laipuiah rawtna siamin heng area-a Village Council ten tanpui an ngai hle a, anmahni dawm kanna tur tanpuina pe turin a ngen a. He rawtna bawhzui hian Mizoram Sawrkar chuan Ministry of Panchayati Raj hriatpuiin Ministry of Finance ah dilna a thlen a. 6^th Schedule in a huam loh Village Council-te’n an khaw hmasawnna hna an thawh theih nan cheng vaibelchhe 45.44 a pe ta a ni.

Sum sem dan chu a hnuaia mi ang hi a ni:

Village Council-te chu hna tha taka thawk tura beisei an ni a. An hmanna pawh mumal takin cash book-ah ziahluh a ngai dawn a. Sum chevel leh an hnathawh te Accountant General, Mizoram leh Local Fund Audit ten uluk takin a endik zui dawn avangin VC-te chu fimkhur leh felfai taka an account te vawng tur leh tha taka hnathawk turin sawrkar chuan a beisei a ni