No.1783/2021-2022
Aizawl, the 11th August 2021: Tukin zingkar khan LAD Minister Pu K.Lalrinliana chuan Brig T. Sailo Park, Lengpui a tlawh a. Park chhunga hmalakna te enfiahin cheibawl ngai lai te a Local Administration Department official te nen an enho a ni.

LAD Minister Pu K.Lalrinliana chuan Park luhna bula Vantlang tuichenna tur - Public Swiming Pool siam thar a enfiah hmasa a. Hrileng laka boruak a ziaawm huna mipui ten luh man chawia he Public Swiming Pool hi an hman theih dan tur official te a sawipui a. Park chhunga thlenna in - Cottage, Common Room, Dinning hall, Toilet, kawttual, inkalpawhna kawngpui leh steps chei that dan tur te bakah Park chhunga ramngaw tha zawka humhalh dan tur te sawiho a ni bawk a ni.

LAD Minister Pu K.Lalrinliana chuan Hlimen Park hlawhtling takin pawn lam mi enkawltir mek a nih thu a sawi a. Brig T.Sailo Park pawh pawisa tam zawk a thawhchhuah theih nan te leh a hmangtu mipui te tana service tha zawk a awm theih nan sawrkarin outsource tha a ti a, hemi chungchang hi ngaihtuah mek a ni a ti. Pu K.Lalrinliana chuan Brig T.Sailo Park awmna lai chu Aizawl atanga hnaivai, pan awlsam a nih bakah a hmunhma te a rem hle a, pantu pawh an awm tam thin hle tih a sawi a. Tuna cottage awmsa aia tam zawk cottage siam belh a, cottage chhung mawi mam zawk a chei theih a nih chuan sum lakluhna tha tak a nih a rinawm a ni a ti.

Pi Rita Lalnunmawii Pachuau, Director leh Pu Lalchawimawia, Jt Director, LAD bakah LAD Engineer leh Lengpui Khawtlang hruaituten LAD Minister hi Park chhung fankualpuiin hnathawh mek te sawiho a nih bakah hmalak ngai lai te lo an lo sawipui bawk a ni.