Higher & Technical Institute, Mizoram (HATIM) chuan vawiin khan 'Graduation Day 2014' an hmang a, he hunah hian LAD Minister Pu PC Lalthanliana chu Khuallian niin zirlai hlawhtlingte chu hnenah Certificate leh Award hrang hrang a hlan a ni.

HATIM Graduation Day inkhawm an Principal Dr.Chawngthanpari kaihhruaiah Khuallian Pu PC Lalthanliana chuan HATIM chu beisei piah lamah hlawhtlinna a chang zel a, hei hi he zirna ina Principal, zirtirtute leh hnathawk zawng zawngte thawhrimna rah a ni tiin a duhsakna a hlan a. Zirna in tha tehfung chu a building that leh that lovah a innghat ngai lo a ni, a ti. Zirlaite hi nakin huna kan ram leh hnam innghahfak an ni kan tih rualin thiamna tak tak chhar si lo, kuthnathawk hmusit tawk leka lehkha zir an tam ang tih a hlauhawm a, heng hi ram leh hnam hmelma leh tichhetu ah an tang zawk thei a ni, a ti a. Vawiina HATIM zirlai pass chhuakte chu fuihin Minister chuan vawiina an hlawhtlinna hi an bultanna chauh a ni tih hriain tum mumal tak neia an nun hmang chho zel turin a chah a ni. Pukpui hmuna HATIM Campus thar awmna tur buatsaih mek chu a tul ang angah theihtawp a lo chhuahpui tur thu Khuallian hian a sawi a, HATIM hlawhtlinna lawmpui nan photocopier (Xerox) khawl a pe nghal bawk a ni.

Higher & Technical Institute, Mizoram (HATIM) hi Baptist Church of Mizoram (BCM) enkawl lai niin 21 June, 2007 khan he zirna in hi Principal, Lecturer 2, Staff 3 leh zirlai 29 neiin tan a ni a. January ni 24, 2008 khan Education Minister Dr.Lalthangliana khan a hawng a ni. HATIM hian Mizoram University hnuaiah Bachelor of Computer Applications (BCA), Bachelor of Commerce (Honours), Bachelor of Commerce (General), Bachelor of Social Work leh Bachelor of Arts (English Core) Course-te a nei mek a ni. Vawiina Graduation Day 2014 hmanah hian zirlai 53 lai heng Course hrang hrang zovin an pass chhuak a ni.