Nimin ni 22nd May 2014 khan LAD Minister leh bialtu MLA ni bawk Pu PC Lalthanliana chuan Sekhum-a Primary Health Sub-Centre Clinic a hawng.

PHC thar hawnna inkhawm Sekhum VCP Pu Lalrintluanga Sailo kaihhruaiah Minister Pu PC Lalthanliana chuan Sekhum-a chengte tana hriselna lam enkawltu tur an nei ta chu a lawmawm hle a ni, a ti a. Hemi hlawntlinna tura chak taka hmalatu Chief Minister Pu Lal Thanhawla leh Health Department chungah bialtu MLA anih angin lawmthu a sawi bawk a ni. Hriselna tha hi mimal, chhungkua leh rampum mamawh a nih angin PHC-a thawktu turte chuan theihtawp chhuah turin a chah a; Sekhum mipuite pawhin PHC hlut thiamin chhawr tangkai turin a duhsakna a hlan a ni. NLUP tanpuina sem zel dan tur chungchang sawiin Minister chuan NLUP Phase 2, 3 & 4 te pawh tuam chhoh mek a ni dawn a, sorkar thuawi lo leh ti tha duh lote erawh pek an ni tawh dawn lo a ni, a ti. Sorkarin kuthnathawktute tan sum tam tak sen pawh a inhuam avangin hlawhtling leh intodelhna thinlung pu turin a chah a ni.

Haulawng PHC Medical Officer Dr.Lalchamliana chuan Technical Report pein Health Sub-centre Clinic sak nan Rs.6,16,000 sen a nih thu leh Quarter sak nan Rs.6,78,700 hman a nih thu a tarlang a. Heng hi Female Health Worker pakhatin awmchilhin a enkawl ang a, Haulawng PHC doctor pahnih, Dr.Lalchamliana leh Dr.Rochansangi, ten Haulawng atangin Sekhum PHC hi an enkawl dawn a ni.

Nimina Sekhum PHC thar hawnnaah hian Minister Pu PC Lalthanliana hi Lunglei District CMO Dr.VLS Dawngliana, Social Welfare Department leh I&PR officials ten an tawiawm a ni.